ديماش قىتايداعى تىڭدارماندارىمەن كەزدەستى

 قىتايدا ديماش قۇدايبەرگەننىڭ جانكۇيەرلەرى قازاقشا ءان شىرقاپ قارسى الدى. كورشى ەلگە ساپارلاپ بارعان ءانشىنى كەيبىر تىڭدارماندارى ءتۇنى بويى كىرپىك ىلمەي قازاقستاننىڭ مادەنيەت ورتالىعىنىڭ الدىندا كۇتكەن.

 بەيجىڭ قالاسىنىڭ تۇرعىنى مي مين ديماش دەسە ىشكەن اسىن جەرگە قويادى. ول ءانشىنىڭ كەيىنگى 9 جىلدا الىس-جاقىن شەتەلدەردە وتكىزگەن كونسەرتتەرىنىڭ ءبىر دە بىرەۋىن جىبەرمەي قاتىسقان. قازاقتىڭ سالت-ءداستۇرى مەن تاريحىن وقىپ بىلگەن. قازىر قازاق ءتىلىن ۇيرەنىپ، دومبىرا شەرتۋگە قىزىعىپ ءجۇر.

 مي مين، بەيجىڭ قالاسىنىڭ تۇرعىنى:

 - تەلەفونىمداعى ۆيدەو، فوتوسۋرەتتەردىڭ 95 پايىزى ديماشپەن بايلانىستى. ءبارىن كورسەتۋ ءۇشىن كوپ ۋاقىت كەرەك. مەن ونىڭ ارقاسىندا بۇكىل الەمدى شارلادىم. اسىرەسە قازاق ەلى تۋرالى كوپ ءبىلدىم. مادەنيەتىمەن تەرەڭ تانىستىم. ەندىگى ارمانىم دومبىرا ۇيرەنىپ، ونىڭ تۋىپ وسكەن قالاسى اقتوبەگە بارىپ كورۋ.

 يۋي يە، بەيجىڭ قالاسىنىڭ تۇرعىنى:

- ديماش تاڭعاجايىپ ءانشى. ول ءان ايتقاندا دەنەم تۇرشىگىپ، ەرەكشە كۇيگە تۇسەم. مەن ونىڭ ونەرىن كورىپ، ەستىگەن ساتتەن باستاپ جانكۇيەرىنە اينالدىم. بۇرىن استانا تۋرالى بىلمەۋشى ەدىم. قازاقستان مەن ءۇشىن جۇمباق ەل بولاتىن. ديماش ءۇشىن زەرتتەپ، ءبارىن ءبىلىپ الدىم.

 ساپار بارىسىندا ديماش قازاقستاننىڭ قىتايداعى مادەنيەت ورتالىعىندا بولىپ جۇمىسىمەن تانىستى. حالىقارالىق دەڭگەيدەگى ساراپشىلارىمەن كەزدەسىپ، ەكى ەلدىڭ ونەر، مادەنيەت سالاسىنداعى ىنتىماقتاستىعى جايىندا پىكىر الماستى. تىڭدارماندارىمەن جۇزدەسىپ قولتاڭبا تاراتتى.

 https://24.kz