ديماش قىتاي تەلەارناسى كورسەتەتىن انشىلەر بايقاۋىنىڭ پروديۋسەرى بولادى

الماتى. KAZINFORM - الماتىدا ديماشتىڭ فان-كەزدەسۋى ءوتىپ جاتىر.

Almaty Arena كەشەنىندە ۇيىمداستىرىلعان كەشتە ونەرپاز ءسۇيىنشى جاڭالىقپەن ءبولىستى.

- قۋانىشتى جاڭالىعىم بار. كەزىندە الەمنىڭ تۇكپىر-تۇكپىرىندەگى فان-توپتارىمنىڭ قالىپتاسۋىنا سەپتىگىن تيگىزگەن ۇلكەن تەلەجوبا - y’m singer- ءدى كورسەتكەن Hunan TV ارناسىمەن بىرىگىپ، مەنىڭ العاشقى پروديۋسەرلىك جۇمىسىم شىعايىن دەپ جاتىر. ول - y’m singer جوباسى سەكىلدى، ءبىراق باسقا فورماتتا، باسقا باعىتتا الەمدىك دەڭگەيدە وتەتىن حالىقارالىق انشىلەر بايقاۋى. سول جوبانىڭ پروديۋسەرى رەتىندە اياق الىسىم سىزدەردىڭ نازارلارىڭىزدا وتپەك جانە جيۋري مۇشەسى بولامىن. «ارىق ايتىپ، سەمىز شىق» دەمەكشى، الداعىنى بىرگە كورە جاتامىز، - دەدى ديماش قۇدايبەرگەن.

ەسكە سالايىق، 27-مامىردان باستاپ استانادا وتكەن «Stranger» شوۋى ەلىمىزدە العاش رەت كينوتەاترلاردا كورسەتىلەدى.

بۇعان دەيىن ديماشتىڭ بۇگىنگى فان-كەزدەسۋىنە 40 تان استام ەلدەن جانكۇيەرلەر كەلگەنىن جازعانبىز.

وسى ايدا ديماش قۇدايبەرگەن بەلگىلى قازاق اقىنى ءارى جازۋشىسى، قازاق ادەبيەتىنىڭ نەگىزىن سالۋشىلاردىڭ ءبىرى ساكەن سەيفۋلليننىڭ انىنە تۇسىرىلگەن جاڭا بەينەباياننىڭ تۇساۋىن كەستى.