ديماش قۇدايبەرگەننىڭ ىستانبۇلداعى كونسەرتى جۇرتتى ءدۇر سىلكىندىردى
استانا. KAZINFORM - ديماش قۇدايبەرگەن ءوزىنىڭ 30 جىلدىق مەرەيتويى قارساڭىندا ىستانبۇلدا جەكە كونسەرتىن بەردى.

ىستانبۇلداعى بەشيكتاش ستاديونىندا وتكەن ديماشتىڭ كونسەرتى كورۋ ءۇشىن الەمنىڭ كوپتەگەن ەلدەرىنەن: تۇركيا، قىتاي، سونداي- اق، ەۋروپا، ا ق ش، ازيا مەن افريكانىڭ كوپتەگەن قالالارىنان جانكۇيەرلەر جينالدى.
ىستانبۇلداعى 42500 ورىندىق «بەشيكتاش» ستاديونى لىق تولدى.
ديماشتىڭ گەرمانيا مەن ارگەنتينادان كەلگەن جانكۇيەرلەرى كونسەرتكە ارنايى ۇشىپ كەلگەندەرىن ايتتى.
- ءبىز ونىڭ ءانىن تىڭداۋ ءۇشىن ىستانبۇلعا كەلدىك. ديماشتىڭ تۇركيادا كونسەرت بەرەتىنىن بىلگەن بويدا بيلەت ساتىپ الدىق، - دەيدى تىڭدارماندار.
ديماش ونەرىن قازاق، تۇرىك، اعىلشىن جانە قىتاي تىلدەرىندەگى حالىقتىڭ ەڭ سۇيىكتى اندەرىمەن باستادى.
ءان اراسىندا ديماش كورەرمەندەرمەن: جەرلەستەرىمەن قازاق تىلىندە، شەتەلدىك فاناتتارمەن اعىلشىن تىلىندە سويلەستى. ءسوز اراسىندا ءانشى ىستانبۇلدا ونەر كورسەتكەنىنە قۋانىشتى ەكەنىن جەتكىزدى.
ساحنادا ونەرپازبەن بىرگە تۇرىك مۋزىكانتتارى حالۋك ليەۆەنت پەن بۋراك يەتەر قوناق رەتىندە ونەر كورسەتتى.
ساحنادا قوبىز، گيتارا، دومبىرا ءۇنى كۇمبىرلەدى. كونسەرت سوڭىندا ديماش زاماناۋي وڭدەۋدە «ءدۇرداراز» ءانىن ورىندادى. جاڭا ستيلدە قازاقتىڭ حالىق ءانى بۇكىل ستاديوندى ءدۇر سىلكىندىردى.
اۆتور
ەركەجان سماعۇلوۆا