ديماش قۇدايبەرگەننىڭ 30 جاسىنا ارنالعان كونسەرتى قاي قالادا وتەدى
استانا. KAZINFORM-بيىل 24-مامىردا الەمگە تانىمال ديماش قۇدايبەرگەن 30 جاسقا تولادى.
وسىنىڭ قۇرمەتىنە ءانشى ىستانبۇلدىڭ بەشيكتاش ستاديونىندا جەكە كونسەرتىن وتكىزەدى.
بۇل تۋرالى مەرەكەلىك ءىس-شارالار ۇيىمداستىرۋمەن اينالىساتىن BWO كومپانياسى الەۋمەتتىك جەلىدە جاريالادى.
«الەمنىڭ ەڭ بىرەگەي داۋىسى بەشيكتاش ستاديونىندا! بيلەتتەر 9-اقپاندا ساتىلا باستايدى. بۇل ديماش قۇدايبەرگەننىڭ 30 جاسقا تولۋىنا ارنالعان كونسەرت»،- دەپ جازدى BWO كومپانياسى Instagram جەلىسىندە.
ايتا كەتەيىك، بەشيكتاش ستاديونى 1947-جىلى ىستانبۇلدىڭ ەۋروپالىق بولىگىندە، بوسفور بۇعازىنىڭ جاعالاۋى ماڭىندا اشىلعان. قازىرگى ۋاقىتتا ستاديون اۋماعىنا 42 مىڭعا جۋىق كورەرمەن سىيادى.
بۇعان دەيىن ديماش قۇدايبەرگەن ماجارستان استاناسىندا يسپانيالىق وپەرا ءانشىسى پلاسيدو دومينگومەن بىرگە ونەر كورسەتكەن ەدى. ولار جورج بيزەنىڭ 1863-جىلعى «The pearl Fishers» وپەراسىن ورىندادى.
