ديماش قۇدايبەرگەن سۋ تاسقىنىنان زارداپ شەككەن جەرلەستەرىن قولداپ كەلدى
اقتوبە. KAZINFORM -ءانشى ديماش قۇدايبەرگەن تۋعان جەرى اقتوبەگە كەلدى. ول ساياجاي اۋماعىندا تۇراتىن، ءبىراق قازىر باسپاناسىن تاستاپ № 40 مەكتەپتە ۋاقىتشا تۇرىپ جاتقان تۇرعىندارمەن كەزدەستى. وسىلايشا قيىن ساتتە جەرلەستەرىمەن بىرگە ەكەنىن جەتكىزىپ، قايىرىمدىلىق قورىنا قارجى اۋداردى.
ەلىمىزدە سۋ تاسقىنى باستالعان كەزدە حالىقتى سابىرعا شاقىرىپ، ءوزىنىڭ قاي ساتتە دە قولداۋعا ءازىر ەكەنىن جەتكىزگەن ءانشى ديماش قۇدايبەرگەن بۇگىن اقتوبە وبلىسىنا كەلدى.
ول الدىمەن باسپاناسىنا سۋ كىرگەن قامكوڭىل جەرلەستەرىنە دەمەۋ بولىپ، ولاردىڭ جانىنان تابىلدى.
جىلى ءسوزىن ارناپ، مەملەكەت باسشىسى قاسىم-جومارت توقايەۆتىڭ تاپسىرماسى نەگىزىندە ەلدەگى اتقارىلىپ جاتقان ىستەرگە توقتالدى.
— بالا كەزدەن باستاپ تىلەۋىمدى تىلەپ، بيىككە قانات قاعىپ، قالىقتاپ ءجۇرسىن دەگەن تىلەك تىلەپ جۇرگەن جەرلەستەرىمنىڭ قال- جاعدايىن بىلمەي كەتە المادىم. جاڭالىقتاردان مەملەكەت تاراپىنان اۋقىمدى سومادا كومەك بەرىلىپ جاتىر دەگەندى وقىپ جاتىرمىن. ەڭ باستىسى، ەلىمىز امان بولسىن، جۇرتىمىز تىنىش بولسىن، — دەدى ءانشى.
ءوزى دە يگى ىستەن شەت قالماي، تۋعان جەرىنە ساپارى بارىسىندا قايىرىمدىلىق قورعا اقشا اۋداردى.
ءتىپتى كۇن-ءتۇن دەمەۋ تىنىمسىز ەڭبەك ەتىپ، سۋ تاسقىنى كەزىندە بەل جازباي كومەكتەسىپ جۇرگەن ەرىكتىلەرمەن كەزدەستى.
گۋمانيتارلىق كومەك بەرۋ ورتالىعىنىڭ ۇيلەستىرۋ جۇمىسىمەن تانىستى.
بۇل اقتوبەلىكتەر ءۇشىن ۇلكەن دەمەۋ، قولداۋ ساپارى بولدى.
ايتا كەتەيىك، اقتوبە وبلىسى بويىنشا «اناعا تاعزىم» ورتالىعى نەگىزگى گۋمانيتارلىق كومەك قابىلداۋ ورنى دەپ بەكىتىلدى.
مۇندا قازىر اتىراۋ، ماڭعىستاۋ، تۇركىستان، قىزىلوردا وبلىستارىمەن قاتار قىرعىزستاننان دا كومەك كەلىپ، قابىلداندى.
وسى ورتالىقتاعى ەرىكتىلەر ازىق-تۇلىك، كيىم-كەشەك پەن توسەك-ورىندى، گيگيەنالىق زاتتاردى سۇرىپتاپ، ازىرلەيدى.
سۇرانىس تۇسكەن ساتتە بىردەن جيناقتاپ، جۇك كولىكتەرىنە تيەپ بەرەدى. ال تاسىمالداۋ قىزمەتىنە اۆتوەرىكتىلەر جۇمىلدىرىلعان.
سۋ تاسقىنى باستالعاننان بەرى 8600 ۆولونتەر تاۋلىك بويى جۇمىس ىستەدى. قازىرگى تاڭدا گۋمانيتارلىق كومەك ورتالىعىنا جەتكىزىلگەن 170 توننا ازىق-تۇلىك جانە 50 توننا تاۋار اۋداندارعا تاراتىلدى.
ەسكە سالساق، اقتوبە وبلىسى بويىنشا سۋ تاسقىنى كەزىندە زارداپ شەككەن اۋدان بالالارى تالعارداعى دەمالۋ لاگەرىنە جولداما بەرىلدى. وندا 11 وقۋشى اتتاندى.
سونىمەن بىرگە ش. بەرسيەۆ اتىنداعى ورتا مەكتەپتىڭ ءبىتىرۋشى تۇلەكتەرى وبلىس ورتالىعىنا كەلىپ، وقىپ ءجۇر.
