ديماش قۇدايبەرگەن قۇلسارى تۇرعىندارىنا قولداۋ ءبىلدىردى
استانا. KAZINFORM - ديماش قۇدايبەرگەن قۇلسارى قالاسىنا كەلىپ، سۋ تاسقىنىنان زارداپ شەككەن تۇرعىندارمەن كەزدەستى.
تانىمال ءانشى سۋ تاسقىنىنان زارداپ شەككەن قۇلسارى تۇرعىندارىنا قولداۋ ءبىلدىردى.
«قيىن-قىستاۋ كۇندەردە ءبىر جاعادان باس، ءبىر جەڭنەن قول شىعارىپ، وسىلاي ءبىر-بىرىمىزگە كومەك كورسەتىپ جۇرۋگە جازسىن. ەڭ باستىسى ەلىمىز امان، جۇرتىمىز تىنىش بولسىن. قازىرگى تاڭدا بىزگە بىرلىك كەرەك. سابىر ساقتاۋ كەرەك. قۇدايدان ۇلكەن ۇمىتپەن جاقسىلىق تىلەيىك»، - دەدى ديماش.
ءانشىنىڭ قيىندىققا تاپ بولعان جۇرتتىڭ ورتاسىنا كەلىپ، جاناشىرلىق تانىتىپ جاتقانىنا قۇلسارىلىقتار ريزا بولىپ، العىسىن ايتتى.
«ءوزىڭىز كەلىپ، كورىنىپ، قولداۋ ءبىلدىرىپ جاتقانىڭىزعا كوپ-كوپ راحمەت»، - دەدى اۋىل تۇرعىندارىنىڭ ءبىرى.
سونداي-اق، ديماش: «مەملەكەت تاراپىنان جاعداي جاسالادى دەپ جاڭالىقتاردان وقىپ جاتىرمىن، مەن دە پرەزيدەنتىمىز ايتقان سوڭ سىزدەرمەن بىرگە وسىعان سەنىپ وتىرمىن. بۇگىنگى كۇنى وسى جەرگە كەلۋىمىزگە وسىنداي جاعداي سەبەپ بولسا، الداعى ۋاقىتتا تەك قۋانىش سەبەپتەرگە كەلىپ، قۋانىشتى ۇلعايتا بەرەيىك»، - دەپ، كوپشىلىكتى ەرتەڭگە ۇمىتپەن قاراۋعا شاقىردى.
تابيعي اپاتپەن تىنباي كۇرەسىپ جاتقان ساربازدار جانە ەرىكتىلەرمەن دە جۇزدەسىپ، جۇمىس بارىسىمەن تانىستى. ودان بولەك، بەسىنشى اۋداننىڭ اق جاۋلىقتى انالارى ازىرلەگەن ايتتىق داستارحاننان ءدام تاتتى.
