ديماش قۇدايبەرگەن: ماقساتىم - قازاق ارتىستەرىن الەمگە تانىتۋ
الماتى. KAZINFORM - الماتىدا وتكەن «New Vision: بيزنەس كۇشى» جاھاندىق بيزنەس-فورۋمىندا تانىمال قازاقستاندىق ءانشى ديماش قۇدايبەرگەن شىعارماشىلىق جوسپارىمەن ءبولىسىپ، ايگىلى حيتتەرىن ورىندادى.
«الداعى جىلدارى ۇلكەن جوبالاردى قولعا الامىن. مەن قازىر مۇمكىندىكتەرىمدى ءتيىمدى پايدالانعىم كەلەدى. حالىقارالىق ارەناعا قازاقتىن ۇل-قىزدارىن شىعارسام دەيمىن. بارىنشا قولداپ، جول سىلتەپ، مىقتى مەنەدجەرلەرمەن تانىستىرىپ، ۇلكەن اگەنتتەرگە كورسەتىپ، جول سالىپ بەرگىم كەلەدى. مەنىڭ دە داۋرەنىم وتپەلى. بۇل كۇن بۇگىن بار، ەرتەڭ جوق. سوندىقتان قازاققا قازاقتىڭ مۇددەسى ءۇشىن پايدامدى تيگىزە السام ودان باسقا مەنىڭ ارمانىم جوق. مەن 5 جاسىمنان باستاپ مۋزىكادان ءدارىس الىپ كەلە جاتىرمىن. بيىل دوكتورلىق دارەجەمدى قورعايمىن. جيناعان تاجىربيەمدى ۇلكەن ءانشى بولۋدى ارمانداپ جۇرگەن جاس جەتكەنشەكتەرمەن بولىسكىم كەلەدى»، - دەيدى ديماش قۇدايبەرگەن.
ول سونداي-اق ءتۇرلى قالالار مەن ەلدەردەن ۇشىپ كەلگەن جانكۇيەرلەرىنە العىس ايتتى. رەسپۋبليكا سارايىنىڭ ساحناسىندا جۇرگىزۋشىنىڭ سۇراقتارىنا جاۋاپ بەرە وتىرىپ، وتانعا دەگەن سۇيىسپەنشىلىگىن ءبىلدىردى. ءانشى «وتانىڭ قانداي؟» دەگەن سۇراققا جاۋاپ بەردى.
«رۇقسات ەتسەڭىز، مەن بۇل سۇراققا فيلوسوفيالىق تۇرعىدان جاۋاپ بەرەيىن. اعىلشىن-امەريكالىق جازۋشى توماس پەين بىلاي دەگەن ەكەن: «جەر - مەنىڭ وتانىم، بارلىق ادامدار - مەنىڭ باۋىرىم» دەگەن. بۇل جەردە مەن ءوز وتانىمدى، ەلىمدى، حالقىمدى سۇيەتىنىمدى ايتقىم كەلەدى، ءبىراق مەن ادامزاتتى دىنگە، ەلگە، ۇلتقا بولگىم كەلمەيدى. ءبىز، قازاق - دانا حالىقپىز، ءار ادام ءوزى ءۇشىن جاۋاپتى. دوستارىنا، اينالاسىنا مەيىرىمدى بولۋى كەرەك، سوندا بۇل ادام ءوزىنىڭ دانالىعىن كورسەتەدى. مەنىڭ ويىمشا، ءاربىر مەملەكەت وسى فيلوسوفيانى ۇستانۋى قاجەت. اتا-بابالارىمىز وسى جەر ءۇشىن كۇرەسىپ، ونى ۇرپاقتارىنا امانات ەتىپ قالدىردى. ال ءبىز ونى كەيىنگى ۇرپاققا جەتكىزۋىمىز كەرەك. ءبىز ۇلى بولاشاققا دايىن ەكەنىمىزدى، ۇلى بابالاردىڭ ۇرپاعى ەكەنىمىزدى كورسەتۋىمىز كەرەك. بۇكىل الەمدە بەيبىتشىلىك بولسىن»، - دەدى ول.
