ديماش قۇدايبەرگەن ماڭعىستاۋدىڭ تۋريستىك الەۋەتىن ناسيحاتتاۋعا ۇلەس قوسپاق
اقتاۋ. KAZINFORM - ماڭعىستاۋ وبلىسىنىڭ اكىمى نۇرداۋلەت قيلىباي وڭىرگە جۇمىس ساپارىمەن كەلگەن تانىمال ءانشى، حالىق ءارتيسى ديماش قۇدايبەرگەنمەن كەزدەسىپ، وبلىستىڭ تۋريزم الەۋەتى جايىندا اڭگىمەلەستى.
كەزدەسۋ بارىسىندا وبلىس اكىمى مەملەكەت باسشىسىنىڭ تاپسىرماسىمەن تۋريزم سالاسىندا قولعا الىنىپ جاتقان جوبالار تۋرالى ايتىپ، ءانشىنى 2025-جىلى اقتاۋ قالاسىندا وتەتىن تۇركى الەمىنە ورتاق مەرەيلى ءىس-شاراعا قاتىسۋعا شاقىردى.
- ديماش، قاسيەتتى ماڭعىستاۋ جەرىندە سەنى كورگەنىمىزگە وتە قۋانىشتىمىز. سەنىڭ بۇل ساپارىڭ - وبلىسىمىزداعى تۋريزمدى دامىتۋعا زور سەرپىن بەرەدى. مەملەكەت باسشىسى قاسىم-جومارت كەمەل ۇلى توقايەۆ ماڭعىستاۋدىڭ تۋريزم سالاسىنداعى الەۋەتىنىڭ جوعارى ەكەنىن ايتىپ، دامىتۋدى تاپسىرعان بولاتىن. بۇگىندە ءبىز بۇل سالاعا تىڭ سەرپىن بەرۋ ءۇشىن ينفراقۇرىلىم ماسەلەسىن كەشەندى تۇردە شەشىپ، تۋريستەر ءۇشىن قىزمەت ساپاسىن جاقسارتۋ باعىتىندا جۇمىستانىپ جاتىرمىز. باكۋ جانە دۋباي قالالارىنىڭ ۇلگىسىمەن اقتاۋ قالاسىنىڭ باس جوسپارىن قايتا قاراۋ ماسەلەسىن قولعا الدىق. تۋريستەردى تارتۋ ماقساتىندا «جىلى جاعاجاي» اۋماعىندا ءبىرقاتار جوبا جاسالىپ جاتىر. بۇيىرسا اقتاۋدى ءىرى كۋرورتتىق ورتالىققا اينالدىرۋ جوسپارىمىزدا بار، - دەدى نۇرداۋلەت قيلىباي.
ەلىمىزدىڭ ونەرىن الەمگە تانىتقان ۇلت ماقتانىشى، تالانتتى ءانشى ديماش قۇدايبەرگەن قازاق تۋريزمىنىڭ امباسسادورى رەتىندە ماڭعىستاۋدىڭ تاريحي-مادەني جەرلەرىن ارالادى. كيەلى ءوڭىردىڭ رۋحانياتى، مادەنيەتى مەن تۋريزمىن كورسەتەتىن دەڭگەيى بولەك تۋىندى ازىرلەۋدى جوسپارلاۋدا. ماڭعىستاۋ وبلىسىنا العاش رەت كەلگەن ءانشى ءوڭىردىڭ تۇمسا تابيعاتىنان ەرەكشە اسەر العانىن جانە مۇنداعى تۋريستىك نىسانداردى ناسيحاتتاۋعا ۇلەس قوسۋعا دايىن ەكەنىن جەتكىزدى.
- بوزجىراعا جاقىنداي بەرگەننەن باستاپ كەرەمەت اسەرگە بولەندىك. ەرتەگى الەمىنە تاپ بولعانداي كۇي كەشتىك. سوزبەن ايتىپ جەتكىزۋ مۇمكىن ەمەس. تۋريزم سالاسىن دامىتۋ باعىتىندا العان ىستەرىڭىزگە ساتتىلىك تىلەيمىن. دەمالىس ورىندارىن دايىنداۋ، ىشكى، سىرتقى تۋريستەردى تارتۋ - وڭاي جۇمىس ەمەس. ءبىز دە ەل مۇددەسى ءۇشىن، مادەنيەتىمىزدى دامىتۋ باعىتىندا جۇمىس ىستەسەك ودان باسقا ارمان جوق. وسى ەلدىڭ بالاسى بولعاندىقتان بارىنشا قولداۋعا دايىنبىز، - دەدى ديماش قۇدايبەرگەن.
