ديماش قۇدايبەرگەن ەلوردادا وتەتىن قوبىزشى ولجاس قۇرمانبەكتىڭ كونسەرتىنە ارنايى قوناعى بولادى

استانا. KAZINFORM - الەمگە ايگىلى ءانشى، وتانداسىمىز ديماش قۇدايبەرگەن قازاقستاندىق قوبىزشى ولجاس قۇرمانبەكتىڭ جەكە كونسەرتىندە ونەر كورسەتەدى. بۇل تۋرالى ءانشى ەلوردادا وتكەن كونسەرتىندە حابارلادى.

«قاسيەتتى قوبىزدى كۇللى الەمگە تانىتىپ جۇرگەن ولجاس قۇرمانبەكتىڭ قوبىزشى رەتىندە العاشقى جەكە شىعارماشىلىق كەشى وتكەلى جاتىر. 15-قىركۇيەك كۇنى بەيبىتشىلىك جانە كەلىسىم سارايىندا سول كەشتە وزدەرىڭىزبەن جولىقسام»، - دەدى ديماش قۇدايبەرگەن جەكە كونسەرتى بارىسىندا.

سونداي-اق، ديماش قۇدايبەرگەن اتالعان شىعارماشىلىق كەشتىڭ ارنايى قوناق ەكەنى تۋرالى قوبىزشى ولجاس قۇرمانبەك Instagram جەلىدەگى پاراقشاسىندا جازبا جاريالاعان.

ايتا كەتەيىك، ديماش قۇدايبەرگەننىڭ ەلورداداعى «استانا ارەنا» ستاديونىندا وتكەن كونسەرتىنە 80 ەلدەن 10 مىڭنان استام شەتەلدىك كورەرمەن كەلدى.

ديماشتىڭ جەكە كونسەرتىن ۇيىمداستىرۋعا 200-دەن استام كاسىپقوي مامان اتسالىسقان. ساحنادا ديماش قۇدايبەرگەنمەن بىرگە ءار ەلدەن كەلگەن 350-دەن استام ادام ونەر كورسەتتى.

كونسەرت الدىندا ديماش قۇدايبەرگەننىڭ ءتۇرلى ەلدەگى 17 كونسەرتىندە بولعان پولشالىق جانكۇيەرى تەرەزا كاكولمەن تىلدەسكەن ەدىك. ول قازاق ءتىلىن ۇيرەنىپ ءجۇر.

اۆتور
داۋلەت ىزتىلەۋ