ديماش قۇدايبەرگەن: حالىقتىڭ مۇراسىن ناسيحاتتاۋ - شىعارماشىلىعىمداعى ماڭىزدى باعىت

الماتى. KAZINFORM _ ديماش قۇدايبەرگەن الماتىدا ءوتىپ جاتقان فان-كەزدەسۋىندە جانكۇيەرلەرىنىڭ سۇراقتارىنا جاۋاپ بەردى.

كەزدەسۋ بارىسىندا ديماش جاقىندا جارىققا شىققان «تاۋ ىشىندە» بەينەبايانى تۋرالى ايتتى.

- «تاۋ ىشىندە» ادامنىڭ تابيعاتپەن ۇندەستىگىن، جان تەرەڭدىگىن، ساعىنىشتى جەتكىزەتىن ۇلى تۋىندى. بۇل ءاننىڭ اۆتورى - قازاق اقىنى ءارى جازۋشىسى ساكەن سەيفۋللين. XX عاسىردىڭ باسىنداعى قازاق ادەبيەتى مەن مادەنيەتىنىڭ، رۋحانياتىنىڭ نەگىزىن قالاۋشىلاردىڭ ءبىرى. وسى ءان ارقىلى مەن سول ءبىر سەزىمنىڭ سۇلۋلىعىن، تازالىعىن بۇگىنگى تىڭدارمانعا، ارتىمىزدان ءوسىپ كەلە جاتقان وسكەلەڭ ۇرپاققا زاماناۋي باعىتتا جەتكىزگىم كەلدى. وسى بەينەبايانعا وزگەشە باعىت تاڭدادىق، جەڭىل كومەديا بولسىن دەدىك. حالىقتىڭ مۇراسىن قازىرگى اۋديتورياعا جاقىنداتۋ - مەنىڭ شىعارماشىلىعىمداعى ماڭىزدى باعىتتاردىڭ ءبىرى، - دەدى ول.

سونداي-اق ونەرپاز اۋستراليالىق جانكۇيەرىنىڭ ء«سىز ءوزىڭىزدى اكتەر نە رەجيسسەر رەتىندە كورەسىز بە» دەگەن سۇراعىنا جاۋاپ بەردى.

- ايتارىم، مەن ءانشىمىن. مۇمكىن بولاشاقتا اكتەرلىكتى قاراستىرىپ كورەمىن. ءبىراق قازىر مەنىڭ بار نازارىم ءان مەن مۋزىكادا، دەدى ديماش قۇدايبەرگەن.

حالىق سۇيىكتىسى تاعى ءبىر سۇراققا جاۋاپ بەرە وتىرىپ، ومىرلىك ۇستانىمدارى تۋرالى ايتىپ ءوتتى.

- اتا-اناما قارىزدار بولىپ ءوتۋ، وتانعا دەگەن سۇيىسپەنشىلىك، تىلگە دەگەن قۇرمەت، حالىققا دەگەن قۇرمەت. مەنى ءاربىر بايقاۋلاردا، كونسەرتتەردە ازدى-كوپتى جەڭىستەرگە جەتىپ جۇرگەن كەزدە اكەم كۇندە ءبىر-اق نارسەنى قايتالاپ: «سەنىڭ كەۋدەڭە نان پىسپەگەنى ۇنايدى» دەپ وتىراتىن. سوندىقتان ءاربىر ايتىلعان سوزدەرى جادىمدا قالدى. ەلىمىز امان بولسىن، جۇرتىمىز تىنىش بولسىن، - دەدى ديماش قۇدايبەرگەن.

بۇگىن ديماش قىتاي تەلەارناسى كورسەتەتىن انشىلەر بايقاۋىنىڭ پروديۋسەرى بولاتىنىن حابارلادى.

بۇعان دەيىن ديماشتىڭ بۇگىنگى فان- كەزدەسۋىنە 40 تان استام ەلدەن جانكۇيەرلەر كەلگەنىن جازعانبىز.