ديماش نيۋ-يوركتەگى كونسەرتى تۋرالى دەرەكتى فيلم دايىنداپ جاتىر
استانا. قازاقپارات - 5 - قازاندا نيۋ-يوركتە ديماشتىڭ جەكە كونسەرتى ءوتتى. Madison Square Garden كورەرمەندەرى ديماش قۇدايبەرگەننىڭ قويىلىمىن ىستىق ىقىلاسپەن قابىلدادى، دەپ حابارلايدى Dimashnews.
- مىڭداعان جۇرەك. ءبىر دەم. بۇل ءتۇن تاريحتا دا، مەنىڭ جۇرەگىمدە دە ماڭگى قالادى. وسى ارماندى مەنىمەن بولىسكەن مەنىڭ كومانداما، مۋزىكانتتارعا، كورەرمەندەر مەن وسى ساپارعا سەنىم ارتقان ءاربىر جانعا العىسىم شەكسىز. مۋزىكا ءبىزدى بىرىكتىرىپ، سونىڭ ناتيجەسىندە قازاقستاننان امەريكاعا دەيىن، جۇرەكتەن جۇرەككە، جاننان جانعا جەتەلەدى، - دەپ جازدى ديماش Instagram داعى پاراقشاسىندا نيۋيوركتەگى كونسەرتىنەن كەيىن.
سول كەشتىڭ فينالىندا ديماش ءوزىنىڭ اۆتورلىق تۋىندىسىن - ءۇش جىلدان استام ۋاقىت بويى جازىلعان، ءتورت ءىرى كونفەسسيانىڭ مۋزىكالىق جانە تاريحي ەلەمەنتتەرى توعىسقان شىعارماسىن ورىنداپ بەردى.
بۇل كومپوزيتسيا «Stranger» تۋرىنىڭ العاشقى كۇنىنەن، ياعني 2022 -جىلدىڭ 23 -قىركۇيەگىندەگى الماتىدا وتكەن شوۋدان باستاپ ديماشتىڭ تۇراقتى رەپەرتۋارىنا ەنگەن. سودان بەرى ءاربىر كونسەرت سايىن ورىندالىپ، كورەرمەندەردىڭ جۇرەگىنەن جول تاۋىپ كەلەدى.
Madison Square Garden زالىنداعى كورەرمەندەر رەكۆيەمدى كوزدەرىندە جاس الىپ، قولدارىن جۇرەكتەرىنە قويعان كۇيى ورىندارىنان تىك تۇرىپ قارسى الدى. بەس، ون، ون بەس مينۋت بويى ەشكىم ورنىنا وتىرمادى.
كەيىن ديماش جانكۇيەرلەرىنە ارناعان ۇندەۋىندە نيۋ-يوركتەگى وسى كونسەرت تۋرالى «ارمانداردىڭ تاريحقا اينالعان ءساتى» اتتى دەرەكتى فيلم دايىنداپ جاتقانىن حابارلادى.
بۇدان بۇرىن حابارلانعانداي، 6-قازان كۇنى مەحيكو اۋەجايىندا قازاقستاندىق ءانشى ديماش قۇدايبەرگەندى جانكۇيەرلەرى قارسى الدى. الەمگە ايگىلى قازاقستاندىق ءانشى العاش رەت مەكسيكادا جەكە كونسەرت بەرۋ ءۇشىن باردى.
