ديماش جاڭا بەينەبايانىمەن ەلىمىزدىڭ تابيعاتىن الەمگە پاش ەتپەك
استانا. KAZINFORM - ديماش قۇدايبەرگەن ەلىمىزدىڭ تۋريستىك ورىندارىندا بەينەبايان ءتۇسىرىپ جاتىر.
تۋريزم جانە سپورت مينيسترلىگىنىڭ مالىمەتىنشە، مينيسترلىك قولداۋىمەن Kazakh Tourism ۇلتتىق كومپانياسى ايگىلى ءانشى ديماش قۇدايبەرگەنمەن بىرگە ەلىمىزدىڭ تۋريستىك ورىندارىندا بەينەبايان تۇسىرۋگە كىرىستى. جوبا اياسىندا تىڭدارماندارعا قازاقستاننىڭ تابيعي جانە مادەني قازىنالارىنا ارنالعان جاڭا مۋزىكالىق كومپوزيتسيا ۇسىنىلادى.
بەينەبايان ءتۇسىرىلىمى شارىن شاتقالى، كولساي كولدەرى، اقمەشىت ۇڭگىرى، ازىرەت-سۇلتان قورىق-مۋزەيى، سونداي-اق بوزجىرا شاتقالى، تورىش القابى جانە تاعى دا باسقا ەلىمىزدەگى تانىمال تۋريستىك ورىنداردا ءوتتى. سونداي-اق جاڭا تۋىندىدا بۋراباي، قاتونقاراعاي، التىن- ەمەل، جوڭعار-الاتاۋى مەملەكەتتىك ۇلتتىق پاركتەرىنىڭ كەرەمەت كورىنىستەرى كورسەتىلەدى دەپ كۇتىلىپ وتىر.
بۇل جوبا قازاقستاننىڭ بىرەگەي سۇلۋلىعىنا نازار اۋدارتىپ قانا قويماي، كورەرمەندەرگە ونەر تۋىندىسى ارقىلى ەلىمىزدى جاڭا قىرىنان كورسەتۋگە جول اشادى. بەينەبايان ارقىلى كورەرمەندەر قازاقستاندى مادەني مۇراسى باي، قايتالانباس تابيعاتى بار ەرەكشە مەكەن رەتىندە تانيدى دەپ ۇمىتتەنەمىز، - دەدى تۋريزم جانە سپورت ۆيتسە-ءمينيسترى ەرجان ەركىنبايەۆ.
جوبا دارىندى ونەرپازىمىزدىڭ جانكۇيەرلەرىن ەلىمىزدىڭ تابيعي جانە مادەني مۇراسىمەن تانىستىرۋعا، سول ارقىلى قازاقستاننىڭ ءتۋريزمىن دامىتۋعا مۇمكىندىك بەرەدى.
«ديماش - قازاقستان تۋريزمىنىڭ ەلشىسى اتاناۋعا لايىقتى تۇلعا. كوپتەگەن ادام قازاقستاندى ديماش ارقىلى تانيدى»، - دەدى ءانشىنىڭ قىتايداعى فانكلۋبى. «ديماش ءبىزدى ونەر ارقىلى قازاقستانمەن تانىستىردى. ول ءوزىنىڭ كونسەرتتەرىندە، كەزدەسۋلەردە ءبىزدى ءاردايىم قازاقستانعا شاقىرادى. شىنايى جانكۇيەرلەرى الەمنىڭ تۇكپىر-تۇكپىرىنەن ديماشتىڭ وتانىنا بارادى. سوندىقتان ءبىز بيىل قىركۇيەكتە استانادا وتەتىن ديماشتىڭ كونسەرتىنە كەلەمىز»، - دەپ پىكىر جازدى جوبا تۋرالى جاريالانىمنىڭ استىنا ولگا گريچەنكو ەسىمدى تىڭدارمان.
