ديكي ارمانعا قاتىسى بار قىلمىستىق توپتىڭ مۇشەلەرى ۇستالدى

ىشكى ىستەر مينيسترلىگى ۇيىمداسقان قىلمىسقا قارسى كۇرەس شەڭبەرىندە ىزدەۋدە جۇرگەن ۇيىمداسقان قىلمىستىق توپ مۇشەلەرىن، ونىڭ ىشىندە قاڭتار وقيعاسىنا قاتىسۋشىلاردى ۇستاۋ بويىنشا شارالار قابىلداپ كەلەدى.

ماسەلەن، وتكەن جىلدان بەرى ەل اۋماعىندا اۋىر جانە اسا اۋىر قىلمىستار جاسادى دەپ كۇدىكتەلگەن ۇيىمداسقان قىلمىستىق توپتاردىڭ 19 كوشباسشىسى مەن بەلسەندى مۇشەسى ۇستالدى.

7- اقپاندا الماتى جانە شىمكەنت قالالارىنىڭ اۋماعىندا ءى ءى م ۇيىمداسقان قىلمىسقا قارسى كۇرەس بولىنىستەرىنىڭ قىزمەتكەرلەرى ۇزاق ۋاقىت بويى قىلمىستىق قۋدالاۋ ورگاندارىنان جاسىرىنىپ جۇرگەن قاڭتار وقيعاسىنىڭ ەكى قاتىسۋشىسىن قولعا ءتۇسىردى. ولار ارمان جۇماگەلديەۆ ۇيىمداسقان قىلمىستىق توبىنىڭ مۇشەسى بولىپ سانالادى.

- ۇستالعانداردىڭ ءبىرى سامات امىربايەۆ 2022-جىلى شىمكەنتتە كىسى ولتىرۋگە جانە سول قالانىڭ باسقا تۇرعىنىنا قاتىستى وزىنشە بيلىك ەتۋگە قاتىسى بار دەپ كۇدىكتەلۋدە. ول تۇركىستان وبلىسىنىڭ اۋماعىندا ۇستالدى. ونىڭ كىسى ءولتىرۋ فاكتىسى بويىنشا سىبايلاستارىنىڭ ءبىرى 16 جىلعا سوتتالىپ، قازىرگى ۋاقىتتا باس بوستاندىعىنان ايىرۋ ورنىندا جازاسىن وتەپ جاتىر.

ۇيىمداسقان قىلمىستىق توپتىڭ ەكىنشى مۇشەسى الماتى اۋەجايىندا شەكارالاس ەلدىڭ اۋماعىنان كەلگەننەن كەيىن ۇستالدى. وندا ول قازاقستاننىڭ قۇقىق قورعاۋ ورگاندارىنان جاسىرىنعان. ۇستالعان ادامدار ۋاقىتشا ۇستاۋ يزولياتورىنا قامالدى، - دەدى ق ر ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.