ديكي ارمانعا قاتىستى جابىق سوتتان ۆيدەو تارادى: نە بەلگىلى؟
استانا. KAZINFORM - ءبىراز ۋاقىت بۇرىن Youtube-تە ديكي ارمان دەگەن لاقاپاتپەن تانىمال ارمان جۇماگەلديەۆكە قاتىستى جابىق سوت پروتسەسىنىڭ ۆيدەولارى پايدا بولدى. بۇل جاعدايعا باس پروكۋراتۋرا پىكىر ءبىلدىردى.
باس پروكۋراتۋرا ۆيدەو تاراپ كەتۋىنە قاتىستى تەرگەۋ باستالعانىن راستادى.
«الماتى پروكۋراتۋراسى سوتالدى تەرگەپ-تەكسەرۋ باسقارماسىنىڭ ءىس جۇرگىزۋىندە قىلمىستىق كودەكستىڭ 423-بابى (سوتقا دەيىنگى ءىس جۇرگىزۋ نەمەسە جابىق سوت تالقىلاۋى دەرەكتەرىن جاريا ەتۋ) بويىنشا قىلمىستىق ىستەر تەرگەلىپ جاتقانىن حابارلايمىز»، - دەپ جازىلعان باس پروكۋراتۋرانىڭ Tengrinews.kz-كە جاۋابىندا.
زاڭ بۇزعان ادامعا قانداي جازا ءتونىپ تۇر؟
اقمولا وبلىستىق ادۆوكاتتار القاسىنىڭ ادۆوكاتى نۇرلان جاڭابايەۆ پروكۋروردىڭ نەمەسە سۋديانىڭ رۇقساتىنسىز سوتالدى ءىس جۇرگىزۋ نەمەسە جابىق سوت تالقىلاۋى دەرەكتەرىن جاريا ەتۋ قىلمىستىق جاۋاپكەرشىلىككە اكەپ سوعاتىنىن ءتۇسىندىردى.
ق ر قىلمىستىق كودەكسىنىڭ 423-بابىنا سايكەس جازالاۋ شارالارىنا مىنالار جاتادى:
ەكى مىڭ ايلىق ەسەپتىك كورسەتكىشكە دەيىنگى ايىپپۇل؛
600 ساعاتقا دەيىنگى قوعامدىق جۇمىستار؛
سول مەرزىمگە تۇزەتۋ جۇمىستارى؛
ەكى جىلعا دەيىنگى مەرزىمگە باس بوستاندىعىن شەكتەۋ؛
سول مەرزىمگە باس بوستاندىعىنان ايىرۋ.
«قىلمىستىق-پروتسەستىك كودەكستىڭ 201-بابىنا سايكەس سوتالدى تەرگەپ-تەكسەرۋدى جاريا ەتۋگە جول بەرمەۋ كوزدەلگەن. بۇل باپتا ءىستىڭ جاريالىعىن تەك پروكۋروردىڭ رۇقساتىمەن اشۋعا بولاتىنى ايتىلادى. كونستيتۋتسياعا سايكەس باس پروكۋراتۋرا قازاقستان اۋماعىندا زاڭناما بىركەلكى قولدانىلۋىنا قاداعالايدى»، - دەيدى جاڭابايەۆ.
سوت پروتسەسى باستالار الدىندا سۋديا بارلىق قاتىسۋشىعا ەرەجەلەردى حاباردار ەتەدى. سوت وتىرىسىن جازۋعا، ستەنوگرامماعا، فوتو نەمەسە بەينەتۇسىرىلىمگە سۋديانىڭ رۇقساتىمەن عانا جول بەرىلەدى.
ەسكە سالايىق، 2022-جىلعى قاڭتار وقيعاسىنا بايلانىستى 7-مامىردا الماتىدا پوليتسيا ديكي ارمان لاقاپ اتىمەن تانىمال قىلمىس الەمىنىڭ سەركەسى ارمان جۇماگەلديەۆتى قاماۋعا العان ەدى. ول ۇلتتىق قاۋىپسىزدىك قىزمەتىنىڭ تەرگەۋ يزولياتورىندا قاماۋدا وتىر.
ديكي ارمان 24 ادامدى كۇشپەن ۇستاعانى ايتىلدى.
