دەپوزيت اشقان كەزدە نەگە نازار اۋدارۋ كەرەك؟
استانا. قازاقپارات - دەپوزيتكە قاراجات سالۋ - بۇل تەك قانا جيناق اقشاڭىزدى ساقتاپ قويۋ ءتاسىلى عانا ەمەس، سونىمەن قاتار قوسىمشا تابىس تابۋ مۇمكىندىگى. سالىمنىڭ بارلىق ارتىقشىلىقتارىن پايدالانۋ ءۇشىن ءبىرقاتار نەگىزگى فاكتورلاردى ەسكەرۋ قاجەت. قازاقستاننىڭ دەپوزيتتەرگە كەپىلدىك بەرۋ قورىنىڭ مالىمەتتەرىنە سۇيەنىپ، Aikyn.kz دەپوزيت اشقان كەزدە نەگە نازار اۋدارۋ كەرەكتىگىن حابارلايدى.
بانك شوتى نەمەسە سالىم شارتىنىڭ تالاپتارىن مۇقيات وقىماۋ
شارتتىڭ ەگجەي-تەگجەيىن بىلمەي جاتىپ وعان قول - قويۋ ءجيى كەزدەسەتىن قاتەلىك. ويتكەنى سالىمنىڭ تابىسى، قاراجاتتى مەرزىمىنەن بۇرىن الۋ بويىنشا شەكتەۋلەر، سالىمعا قاتىستى ماكسيمالدى كەپىلدى وتەم سوماسى، سالىمدى كەلەسى مەرزىمگە ۇزارتۋ ءتارتىبى جانە باسقالار سالىم بويىنشا نەگىزگى تالاپتارعا تىكەلەي تاۋەلدى.
ۇسىنىس: شارتپەن ءارقاشان تولىق تانىسىڭىز. ەگەر سۇراقتارىڭىز تۋىنداعان جاعدايدا مىندەتتى تۇردە ونلاين نەمەسە وفلاين رەجيمىندە بانك مەنەدجەرىنە جۇگىنىڭىز. قازىرگى تاڭدا بانكتەر سالىم نەمەسە شوتتىڭ نەگىزگى تالاپتارىمەن ۇلكەن ارىپتەرمەن جازىلعان كورنەكى كەستە تۇرىندە ونى شارتتىڭ باس جاعىنا ورنالاستىرىپ، كليەنتتى حاباردار ەتۋگە مىندەتتى.
تاڭدالعان دەپوزيتتەر بويىنشا كەپىلدى وتەمنىڭ ماكسيمالدى سومالارىن ەلەمەۋ
قازاقستاندا كەپىلدىك بەرۋ جۇيەسىنە قاتىسۋشى بانكتەردەگى جەكە تۇلعالار مەن دارا كاسىپكەرلەردىڭ جيناقتارىن قدكبق قورعايدى. بانك ليتسەنزيادان ايىرىلعان جاعدايدا، قور وسى بانكتىڭ دەپوزيتورلارىنا وتەم تولەۋ بويىنشا مىندەتتەمەنى ءوز جاۋاپكەرشىلىگىنە الادى. تولەم دەپوزيتتىڭ ءتۇرى مەن ۆاليۋتاسىنا بايلانىستى زاڭنامادا بەلگىلەنگەن وتەمنىڭ ماكسيمالدى سوماسى شەگىندە جۇرگىزىلەدى:
20 ميلليون تەڭگە شەگىندە - تەڭگەدەگى جيناق سالىمدار بويىنشا،
10 ميلليون تەڭگە - تەڭگەدەگى باسقا دەپوزيتتەر، كارتالار جانە شوتتار بويىنشا،
5 ميلليون تەڭگە - شەتەل ۆاليۋتاسىنداعى كارتالار، شوتتار جانە سالىمدار بويىنشا.
ەگەر دەپوزيت سوماسى وسى ليميتتەردەن اسىپ كەتسە، وندا ارتىق مولشەرگە كەپىلدىك بەرىلمەيدى. ال ەگەر سالىمشى ءبىر بانكتە بىرنەشە دەپوزيت اشقان بولسا، وندا كەپىلدىك مولشەرىن ەسەپتەۋ كەزىندە (بانك ليتسەنزيادان ايىرىلعان جاعدايدا) ولار جيناقتالادى جانە تولەمنىڭ جالپى مولشەرى 20 ميلليون تەڭگەدەن اسىرىلمايدى. بۇل رەتتە ءاربىر دەپوزيت ءتۇرى بويىنشا بەلگىلەنگەن ماكسيمالدى وتەم سوماسى ەسكەرىلەدى.
كەڭەس: ۇلكەن سومالاردى كەپىلدىكتىڭ شەكتى سوماسىنان اسپايتىنداي ەتىپ، ولاردى ءارتۇرلى بانكتەرگە بىرنەشە سالىمدارعا ءبولىپ ورنالاستىرعان دۇرىس، ويتكەنى ءارتۇرلى بانكتەردەگى اقشاعا ولاردىڭ ءارقايسىسى ءۇشىن بولەك كەپىلدىك بەرىلەدى.
دەپوزيتتى تاڭداۋ كەزىندە شارتتىڭ مەرزىمىنە نازار اۋدارىڭىز
ءسىز سىياقى مولشەرلەمەسى جوعارى، ۇزاق مەرزىمدى سالىم تاڭدادىڭىز دەلىك. بۇعان دەيىن سىزگە مەرزىمىنەن بۇرىن بارلىق قاراجات قاجەت بولا ما، جوق پا، سونى مۇقيات قاراستىرىڭىز. ويتكەنى بۇنداي سالىمنىڭ شارتتارى بويىنشا مەرزىمنەن بۇرىن الۋعا شەكتەۋلەر بولۋى مۇمكىن، بۇل بارلىق ەسەپتەلگەن پايىزداردىڭ جوعالۋىنا قاۋىپ توندىرەدى.
كەڭەس: ۇلكەن سوما قاشانعا كەرەك ەكەنىن ەسكەرە وتىرىپ، بارلىق نۇسقالاردى ەسەپتەپ، سودان كەيىن عانا سالىم مەرزىمىن تاڭداڭىز، سونداي-اق مەرزىمىنەن بۇرىن الۋ شارتتارىن زەرتتەگەن دۇرىس. سونداي-اق، سالىمشى شارت مەرزىمىنىڭ قاشان اياقتالاتىنىن ەسىندە ساقتاۋ قاجەت، ويتكەنى بانك شارت مەرزىمىنىڭ اياقتالعانى تۋرالى حابارلاۋعا مىندەتتى ەمەس. ەگەر شارت تالاپتارىندا قاراستىرىلعان بولسا، ول اياقتالعاننان كەيىن بانك اۆتوماتتى تۇردە سالىم مەرزىمىن ۇزارتا الادى. ۇزارتۋ كەزىندە سىياقى مولشەرلەمەسى بانكتىڭ اعىمداعى شارتتارىنا بايلانىستى وزگەرۋى مۇمكىن ەكەنىن ەسكەرۋ ماڭىزدى. ەگەر سالىمشىعا سالىم مەرزىمىن ۇزارتۋ تالاپ ەتىلمەسە، وندا بانككە جەكە ءوزى جۇگىنۋ كەرەك. قاراجاتتى قايتارۋ ءتارتىبىن قوسا العاندا، بارلىق مالىمەتتەر سالىم شارتىندا كورسەتىلگەن. ونى سايتتان نەمەسە بانكتىڭ موبيلدى قوسىمشاسىنان كورۋگە بولادى. سونىمەن قاتار اقپاراتى ناقتىلاۋ ءۇشىن بانك مەنەدجەرىنە جۇگىنۋ ۇسىنىلادى.
بانك تاڭداۋ
بۇل سونداي اق سالىمشى ءۇشىن ماڭىزدى. كەيبىرەۋلەر جاقسى ۇسىنىستارعا ۇمتىلۋى مۇمكىن، مىسالى، جوعارى سىياقى مولشەرلەمەسى، قارجىلىق تۇراقتىلىق، بانكتىڭ قارجىلىق تۇراقتىلىعىن تەكسەرمەي سالىمدار اشۋى مۇمكىن. سوندىقتان بانك تاڭداعاندا جارنامالىق ماتەريالدارمەن شەكتەلمەڭىز.
كەڭەس: بانكتەردىڭ رەيتينگتەرىن قاراۋ. ولاردى Moody's سونداي-اق S&P جانە Fitch حالىقارالىق اگەنتتىكتەرى بەرەدى. بۇل بانكتەر بويىنشا بولجامدار - تۇراقتى، پوزيتيۆتى جانە باسقا، سونداي-اق ولاردىڭ رەيتينگتىك باعالارى كورسەتىلگەن. بۇل اقپارات دەپوزيتتى ورنالاستىرماس بۇرىن بانكتىڭ سەنىمدىلىك دەڭگەيىن باعالاۋعا كومەكتەسەدى.
قورىتىندىلاي كەلە، دەپوزيتتى تاڭداۋ كەزىندە ساۋاتتى ءتاسىلدى قولدانا وتىرىپ، ءسىز ءوزىڭىزدىڭ جيناق اقشاڭىزدىڭ سەنىمدى قورعالۋىن قامتاماسىز ەتىپ قانا قويماي، ولاردى مولايتا الاسىز.
