دونالد ترامپ قىتاي تاۋارلارىنا باج سالىعىن 20 پايىزعا دەيىن كوتەردى
استانا. KAZINFORM - اق ءۇي قىتاي جوعارى تاريفتەرگە تاپ بولاتىنىن جاريالاپ، بۇل شەشىمنىڭ باستى سەبەبى رەتىندە ا ق ش- تا جالعاسىپ جاتقان فەنتانيل داعدارىسىن العا تارتتى، دەپ حابارلايدى Fox News.
قىتايعا باستاپقىدا نەبارى %10 كولەمىندە بەلگىلەنگەن تاريفتەر سەيسەنبىدە كۇشىنە ەنەدى. دۇيسەنبىدە ا ق ش پرەزيدەنتى دونالد ترامپ ءوز جارلىعىندا قىتاي ۇكىمەتى «قىتاي حالىق رەسپۋبليكاسىنان قۇراما شتاتتارعا ادەتتەن تىس جانە ەرەكشە قاۋىپ توندىرەتىن سينتەتيكالىق وپيويدتەردىڭ، سونىڭ ىشىندە فەنتانيلدىڭ تۇراقتى اعىنىن تەجەۋ ءۇشىن شارالار قابىلداماعانىن» مالىمدەدى.
ترامپ سونىمەن قاتار داعدارىس «قۇراما شتاتتاردىڭ ۇلتتىق قاۋىپسىزدىگىنە، سىرتقى ساياساتى مەن ەكونوميكاسىنا» قاتەر توندىرەتىنىن ايتتى.
- ق ح ر ەسىرتكىنىڭ زاڭسىز اينالىمى داعدارىسىن جەڭىلدەتۋ ءۇشىن ءتيىستى شارالاردى قابىلداماۋ فاكتىسى مويىنداي وتىرىپ، پرەزيدەنتتىڭ 14195- جارلىعىنىڭ 2(ا) بولىمىنە «10 پايىز» دەگەن سوزدەردى الىپ تاستاپ، ونىڭ ورنىنا «20 پايىز» دەگەن سوزدەرمەن تولىقتىرىلسىن، - دەلىنگەن قۇجاتتا.
ترامپ اكىمشىلىگى قازىردىڭ وزىندە كانادالىق جانە مەكسيكالىق تاۋارلارعا %25 باج سالىعىن ەنگىزىپ جاتىر، ول دا سەيسەنبىدە كۇشىنە ەنەدى.
قىتاي ۇكىمەتى تاريف تۋرالى جاريالانعاننان بەرى ولارعا قارسىلىق ءبىلدىردى. قىتاي سىرتقى ىستەر مينيسترلىگىنىڭ 1-اقپاندا جاساعان مالىمدەمەسىندە قىتاي «ساياسات جاعىنان دا، ىسكە اسىرۋ جاعىنان دا ەسىرتكىگە قارسى كۇرەستە الەمدەگى ەڭ قاتال ەلدەردىڭ ءبىرى» ەكەنىن مالىمدەدى.
ەسكە سالا كەتەيىك، بۇعان دەيىن ترامپ ۋكرايناعا بارلىق اسكەري كومەكتى توقتاتۋعا بۇيرىق بەرگەنىن جازعان ەدىك.
