دونالد ترامپ ميتينگتە وق وتپەيتىن اينەك ارتىندا تۇرىپ سويلەدى

استانا. KAZINFORM – ا ق ش پرەزيدەنتتىگىنە ۇمىتكەر دونالد ترامپ وزىنە قاستاندىق جاسالعاننان كەيىن العاش رەت اشىق ميتينگ وتكىزدى. ساياساتكەردىڭ وق وتپەيتىن اينەك ارتىندا تۇرىپ سويلەگەنىن C- SPAN جاريالاعان كادرلاردان كورۋگە بولادى.

ميتينگ سولتۇستىك كارولينا شتاتىنىڭ ەشبورو قالاسىندا ءوتتى. رەسپۋبليكالىق كانديداتتى ءتورت اينەكتەن تۇراتىن وق وتپەيتىن پانەلدەر قورعاپ تۇردى: بىرەۋى الدىڭعى جاعىندا جانە ۇشەۋى ارتقى جاعىندا. بۇعان دەيىن امەريكالىق ب ا ق ەكس- پرەزيدەنتتىڭ باسىندا بولعان وقيعادان كەيىن ا ق ش قۇپيا قىزمەتى قاۋىپسىزدىك شارالارىن قابىلدايتىنىن حابارلاعان بولاتىن.

ميتينگ باستالعاننان كەيىن كوپ ۇزاماي، جەدەل جاردەم كومەگىنە شاقىرعان داۋىس ەستىلىپ، ترامپ ءسوزىن توقتاتتى. ساياساتكەر قورشاۋدان شىعىپ، قۇپيا قىزمەت قىزمەتكەرلەرىنىڭ قورشاۋىندا جاعدايى قالىپقا كەلگەن ايەلگە تاقاپ، ونى قۇشاقتادى. وسىدان كەيىن ول ساحناعا قايتا ورالىپ، ءسوزىن جالعاستىردى.

13-شىلدەدە باتلەردە (پەنسيلۆانيا) وتكەن اشىق اسپان استىنداعى ميتينگىسىندە ترامپقا قارسى وق اتىلىپ، ول قۇلاعىنان جاراقات الدى. ميتينگتىڭ قاۋىپسىزدىك ايماعىنىڭ پەريمەترىنەن تىس عيماراتتىڭ توبەسىنەن AR-15 ءتيپتى ۆينتوۆكادان 20 جاستاعى توماس مەتتيۋ برۋكس وق جاۋدىرعان. مەرگەن شامامەن 120 مەتر قاشىقتىقتان بىرنەشە رەت وق اتىپ ۇلگەردى، سودان كەيىن ونى قۇپيا قىزمەتتىڭ قارسى سنايپەر كومانداسىنىڭ مۇشەسى ءولتىردى.