دومينيكانداعى وقيعا: كوز جۇمعاندار سانى 100 گە جۋىقتادى
استانا. KAZINFORM - دومينيكان رەسپۋبليكاسىندا تۇنگى كلۋبتىڭ شاتىرى قۇلاپ، 98 ادام قازا تاپتى. بۇل تۋرالى «Listin Diario» گازەتى حابارلادى.
ەلدەگى جەدەل جاردەم ورتالىعىنىڭ ديرەكتورى حۋان مانۋەل مەندەستىڭ ايتۋىنشا، وقيعا سالدارىنان تاعى 146 ادام جاراقات الىپ، اۋرۋحاناعا جەتكىزىلگەن. قۇتقارۋ جۇمىستارى ءالى دە جالعاسىپ جاتىر.
وقيعا 8-ءساۋىر كۇنى تاڭەرتەڭ ەل استاناسى سانتو- دومينگوداعى Jet Set تۇنگى كلۋبىندا ءانشى رۋبي پەرەس ونەر كورسەتىپ جاتقان كەزدە بولعان. ءانشى كورەرمەندەرمەن بىرگە قۇلاعان شاتىردىڭ استىندا قالدى. ءانشى قۇتقارىلعان. قازىرگى ۋاقىتتا ونىڭ جاعدايى تۇراقتى.
انادولى اگەنتتىگىنىڭ حابارلاۋىنشا، قايتىس بولعانداردىڭ اراسىندا بەيسبول ليگاسىنىڭ (MLB) بۇرىنعى ويىنشىسى وكتاۆيو دوتەل دە بار.
ەلدە ءۇش كۇن قارالى دەپ جاريالاندى
دومينيكان رەسپۋبليكاسىنىڭ پرەزيدەنتى لۋيس ابينادەر قايعىلى وقيعاعا بايلانىستى ءۇش كۇندىك ۇلتتىق ازا تۇتۋ جاريالادى.
جاعدايدى ءوز كوزىمەن باقىلاپ، تەكسەرۋ جۇرگىزگەننەن كەيىن ابينادەر بولعان قايعىلى وقيعاعا قاتتى وكىنىش ءبىلدىردى.
- بارلىق قۇتقارۋ قىزمەتى قاجەتتى كومەك كورسەتتى جانە قۇتقارۋ جۇمىستارىن جۇرگىزۋ ءۇشىن ايانباي ەڭبەك ەتىپ جاتىر، - دەدى پرەزيدەنت.
«Jet Set» دومينيكان رەسپۋبليكاسىنداعى ەڭ تانىمال ويىن-ساۋىق ورىندارىنىڭ ءبىرى بولىپ سانالادى.
