دومبىرا مەنى وزىنە ەرەكشە باۋراي ءتۇستى - قىزىلوردالىق جاس ورەن

قىزىلوردا. KAZINFORM - قىزىلوردا قالاسىنداعى نازاربايەۆ زياتكەرلىك مەكتەبىنىڭ 8-سىنىپ وقۋشىسى ادەلينا فينانسوۆا قازاق تىلىندە جاقسى سويلەيدى. قازىر ول دومبىرانى جاقسى مەڭگەرىپ، اندەر مەن كۇيلەردى جوعارى دەڭگەيدە ورىنداۋدى جاقسى مەڭگەرىپ كەلەدى.

ادەلينانىڭ دومبىرا ۇيرەنۋگە دەگەن قىزىعۋشىلىعى جەتىنشى سىنپ وقىپ جۇرگەندە باستالعان ەكەن. مۋزىكا الەمىنە جانى جاقىن جاس ورەندى دومبىرا بىردەن-اق باۋراي ءتۇستى. العاشقىدا ۇستازى جانىبەك ونى قالاي ۇستاۋ قاجەتتىگىن ۇيرەتكەن. دومبىرانى ۇيرەنۋگە دەگەن قىزىعۋشىلىعى ارتقان ادەلينا ءقازىر قازاقتىڭ كوپتەگەن اندەرى مەن كۇيلەرىن ورىنداۋعا ماشىقتانىپ الدى.

«ءاربىر مۋزىكالىق اسپاپتىڭ ءوز قۇپياسى، ءوز سىرى بار. سول ارقىلى ءاربىر حالىقتىڭ جان دۇنيەسىنە بويلاي تۇسەتىنىڭ انىق. ءوزىم مۋزىكاعا جاقىنمىن. سوندىقتان مۋزىكالىق اسپاپتاردى ۇيرەنۋگە ىقىلاسىم ەرەكشە. قازاق حالقىنىڭ بولمىس-ءبىتىمىن ايشىقتايتىن دومبىرا مەنى وزىنە ەرەكشە باۋراي ءتۇستى. سول سەبەپتى ونى ۇيرەنۋگە شەشىم قابىلدادىم. بۇل ماقساتتا ارنايى ءدارىس الۋعا شەشىم قابىلدادىم. وعان اتا-انام دا قارسى بولعان جوق. قولداۋ ءبىلدىردى. وسىلايشا دومبىرا ۇيىرمەسىنە باردىم. بۇل جونىنەن العاشقى ۇستازىم بولعان جانىبەك اعايعا العىس ايتامىن. ول كىسى ىنتا-ىقىلاسىمدى بايقاپ، بىردەن دومبىرانىڭ قىر-سىرىن ۇيرەنە باستادى. سىرت كوزگە بارلىعى وڭاي كورىنەتىن شىعار. دەسە دە مەن ءوز ماقساتىما جەتۋگە بار كۇشىمدى سالدىم. بۇگىندە دومبىرانى ۇيرەنىپ، كوپتەگەن شىعارمالاردى ورىنداي الاتىن دەڭگەيگە جەتتىم. قازىر قوسىمشا دومبىرا سىنىبىنا بارىپ ءجۇرمىن. مەنىڭ بولاشاقتا بيوحيميا سالاسىنىڭ مامانى بولعىم كەلەدى»، - دەيدى ول.

ادەلينانىڭ اكەسى - ورىس، اناسى - قازاق. دوستارىنىڭ بارلىعى - جەرگىلىكتى ۇلت وكىلدەرى.

«وتباسىندا اكەم، انام، مەن جانە ءىنىم بار. اكەم مەملەكەت قىزمەتكەر بولسا، انام جەكە كومپانيادا ەسەپشى قىزمەتىن اتقارادى. ماعان قازاقشا ۇيرەنۋ قيىنعا سوعا قويعان جوق. دوستارىمنىڭ بارلىعى دەرلىك قازاقتار. بالا جاسىمنان اۋىزەكى تىلدە قازاقشا بىلەتىن ەدىم. زياتكەرلىك مەكتەپكە كەلگەننەن كەيىن مۇندا ونى تەرەڭدەتە وقي باستادىم. بۇل جونىنەن ءاسيما اپايعا ريزاشىلىعىمدى بىلدىرەمىن. سونىڭ ارقاسىندا ءتىلدى كەڭىنەن مەڭگەرە باستادىم. وتباسىندا قازاقتىڭ سالت-ءداستۇرىن جاقسى بىلەمىز. ءتۇرلى مەرەكەدە سول سالت-ءداستۇردى قولدانىپ، جەرگىلىكتى ۇلت وكىلدەرىمەن بىرگە تويلايمىز. قازاقستان حالقى بىرلىگى مەرەكەسى كۇنى ءبارىمىز ءۇشىن وتە ماڭىزدى. حالىقتىڭ بىرلىگى قاي كەزدە دە قاجەت. ەلىمىز بۇل جونىنەن الەمدەگى كوپتەگەن مەملەكەتتەرگە ۇلگى بولا الادى. قازاقستاندا كوپتەگەن ۇلتتار تۇرادى. بارلىعى ءبىر شاڭىراق استىندا تاتۋ-ءتاتتى ءومىر ءسۇرىپ كەلەدى. جاراسىمدى ءداستۇر جالعاسىن تابا بەرەدى دەگەن سەنىمدەمىن. باستى كۇشىمىز - بىرلىكتە ەكەنىن جاقسى بىلەمىز»، - دەيدى ادەلينا بىزبەن اڭگىمەسىندە.

اۆتور
ءادىلجان ۇمبەت