دومبىرا بەيجىڭ جۇرەگىندە: ديماش قۇدايبەرگەن قىتاي انشىسىمەن بىرگە جەر حرامىنا باردى

استانا. قازاقپارات - 29-30-جەلتوقسان كۇندەرى قىتايدىڭ BRTV تەلەارناسىنىڭ «最美中轴线 Singing for the Central Axis of Beijing» جوباسى اياسىندا ديماش قۇدايبەرگەن بەيجىڭدەگى جەر حرامىنا بارىپ قايتتى، دەپ حابارلايدى قازاقپارات Dimashnews.com سايتىنا سىلتەمە جاساپ.

بەيجىڭنىڭ ورتالىق ءوسى - قالانىڭ تاريحي ورتالىعىنان وتەتىن ماڭىزدى بولىگى سانالادى. ونىڭ ۇزىندىعى 7,8 شاقىرىمعا سوزىلىپ، قوڭىراۋ جانە بارابان مۇنارالارىنان باستاپ يۋندينمەن قاقپاسىنا دەيىن جالعاسادى. بۇل باعىت 1267 -جىلى يۋان اۋلەتى كەزىندە قالىپتاسقان جانە جەر حرامى مەن اسپان حرامى سىندى ماڭىزدى نىسانداردى قامتيدى. اتالعان حرامدار ءۇش ۇلى باستاۋشى كۇش - جەر، اسپان جانە ادامدى بىلدىرەدى.

باستاپقىدا جەر حرامى مەن اسپان حرامى ءبىر كەشەننىڭ بولىگى بولعان ەدى، 1530 -جىلى ولار ءبولىندى. جەر حرامى تىيىم سالىنعان قالانىڭ سولتۇستىگىندە ورنالاسقان جانە ونىڭ اۋماعىندا رۋحتار مەكەنى مەن قاسيەتتى قويما سياقتى باسقا دا نىساندار بار. ساياباقتىڭ سولتۇستىك- شىعىس بولىگىندە قىتايدىڭ ءداستۇرلى مەديتسينا ساياباعى ورنالاسقان.

«ءبىزدىڭ اندەرىمىز» جوباسىنا قاتىسقان ديماش پەن قىتاي ءانشىسى گۋن ليننا جەر حرامىندا كورىكتى ورىندارمەن تانىسىپ، جەرگىلىكتى تاعامداردان ءدام تاتتى جانە سىيلىقتارمەن الماستى. ديماش دومبىرانىڭ تاريحىن بايانداپ، ونى گۋن لينناعا سىيعا تارتتى.

- بۇرىن دومبىرانىڭ ىشەگى الدەقايدا كوپ بولاتىن. تاريحقا كوز جۇگىرتسەك، باياعىدا ءبىر حاننىڭ جالعىز ۇلى قازا بولىپتى. ۇلىنىڭ ءولىمى تۋرالى قايعىلى حاباردى جەتكىزۋگە قۇزىرىنداعى ەشكىمنىڭ باتىلى جەتپەپتى. سايىپ كەلگەندە، ۇلىنىڭ ءولىمىن دومبىرا ارقىلى ەستىرتىپتى. بارلىعىنىڭ حانعا ۇلىنىڭ ءولىمىن ەستىرتۋگە قورىققان سەبەبى، حان: «بالامدى كوپتەن بەرى تابا الماي ءجۇرمىن. كىمدە-كىم ماعان قايعىلى حاباردى جەتكىزەر بولسا، سونىڭ كومەيىنە قورعاسىن قۇيامىن»، - دەگەن ەكەن. وسىلايشا دومبىرا ادام ءومىرىن ساقتاپ قالىپتى، - دەدى ديماش.

ءداستۇرلى تۇردە ديماش دومبىرادا ويناپ، گۋن ليننا «Jasmin» ءانىن شىرقادى. سونداي-اق، جۇرگىزۋشىلەردىڭ سۇراۋىمەن ديماش ءوز انا تىلىندە «قاراتورعاي» ءانىن ورىندادى.

ءىس-شارا سوڭىندا ولار 1688 -جىلى سالىنعان جەني حرامىنىڭ تەاترىنا باردى. بۇل تەاتر بۇگىنگى كۇنگە دەيىن بەيجىڭ وپەراسىن قويادى جانە مادەني مۇرا بولىپ سانالادى.

بۇعان دەيىن ديماشتىڭ قاتىسۋىمەن قىتايدىڭ وڭتۇستىك- باتىسىنداعى سىچۋان پروۆينسياسىنىڭ استاناسى چىڭدۋ قالاسىندا جاڭاجىلدىق مەرەكە وتكەنى حابارلانعان بولاتىن.

وسىعان دەيىن ديماش قۇدايبەرگەن قازاق ەلىن جاڭا جىل مەرەكەسىمەن قۇتتىقتادى.

اۆتور

ايجان سەرىكجان قىزى