دوللار ساتامىز - سۇلەيمەنوۆ ينفلياتسياعا توتەپ بەرۋ ءتاسىلىن ايتتى

استانا. KAZINFORM - التىن ساتىپ الۋدىڭ ورنىنا مونەتارلىق بەيتاراپتىلىق ساياساتىنا كوشەمىز. بۇل تۋرالى ۇلتتىق بانك باسشىسى تيمۋر سۇلەيمەنوۆ ايتتى.

ҰБ басшысы
Фото: Ұлттық банк

— ينفلياتسيالىق قىسىمدى تومەندەتۋگە جانە ماكروەكونوميكالىق تۇراقتىلىقتى ساقتاۋعا مۇمكىندىك بەرەتىن تاعى دا ءبىر شاراعا توقتالىپ وتكىم كەلەدى.

ۇلتتىق بانك ءوز قىزمەتى اياسىندا التىن ءوندىرۋشى وتاندىق كاسىپورىنداردان التىن ساتىپ الۋدا مەملەكەت قۇقىعىن ىسكە اسىرادى. بۇل شارا حالىقارالىق رەزەرۆتەردى تولىقتىرۋعا جانە ەكونوميكانىڭ سىرتقى نارىقتاعى وزگەرىستەرگە ۇشىراماي دامۋىنا باعىتتالعان. وسى ساياساتتى ۇستانۋ تابىستى بولىپ، رەزەرۆ كولەمىن 45,8 ميلليارد دوللارعا دەيىن، ونىڭ ىشىندە التىن كولەمىن 23,8 ميلليارد دوللارعا دەيىن وسىرۋگە مۇمكىندىك بەردى، - دەدى ول.

ۇ ب باسشىسىنىڭ ايتۋىنشا، مۇنداي وپەراتسيالار تەڭگە ەميسسياسى ەسەبىنەن قارجىلاندىرىلادى. ياعني ەكونوميكاداعى اقشا كولەمىن ارتتىرىپ، ونىڭ تاۋارلىق ماسسادان اسىپ تۇسۋىنە جول بەرەدى. بۇل، ارينە، ينفلياتسياعا اسەر ەتپەي قويمايدى.

— وسىنداي اسەرلەردى ازايتۋ ءۇشىن وتكەن جىلى ۇلتتىق بانك التىن ساتىپ الۋدىڭ ورنىنا مونەتارلىق بەيتاراپتىلىق ساياساتىنا كوشۋ تۋرالى پىكىرتالاس وتكىزدى.

سول پىكىرتالاستىڭ ناتيجەسىندە جانە جۇرگىزىلگەن تالداۋدى ەسكەرىپ، التىن ساتىپ الۋعا بايلانىستى وپەراتسيالاردى تەڭگەرۋ ارقىلى دوللار ساتۋعا كىرىسەمىز، - دەدى سپيكەر.

سۇلەيمەنوۆتىڭ ايتۋىنشا، بۇل وپەراتسيالار ۆاليۋتالىق ينتەرۆەنتسياعا جاتپايدى. وپەراتسيالاردىڭ نەگىزگى مىندەتى - ەكونوميكاداعى ارتىق اقشانى قىسقارتۋ جانە ينفلياتسيانىڭ نىسانالى دەڭگەيىن %5 كە جەتكىزۋ.

— وسى شارالار ىشكى نارىقتا ۆاليۋتاعا ۇسىنىس قالىپتاستىرىپ، ىشكى ۆاليۋتا نارىعىندا بالانستى ساقتاۋعا ىقپال ەتەدى، - دەپ ءتۇيدى ءسوزىن تيمۋر مۇرات ۇلى.

ايتا كەتەيىك، بۇگىن ۇلتتىق بانك بازالىق مولشەرلەمەگە قاتىستى مالىمدەمە جاسادى.

تيمۋر سۇلەيمەنوۆ نە سەبەپتى بازالىق مولشەرلەمەنى %15,25 دەڭگەيىندە ساقتاۋ تۋرالى شەشىم قابىلدانعانىن ءتۇسىندىردى.

سونداي-اق ول ب ا ق وكىلىنىڭ «تەڭگە تياناقتالعان باعامعا قايتا ورالۋى مۇمكىن بە؟» دەگەن سۇراعىنا جاۋاپ بەردى.

سوڭعى جاڭالىقتار