دوللار 600 تەڭگەگە دەيىن ءوسۋى مۇمكىن بە - ۇلتتىق بانك جاۋابى
استانا. KAZINFORM – ق ر ۇلتتىق بانكى ءتوراعاسىنىڭ ورىنباسارى ۆيتالي تۋتۋشكين دوللار باعامىنىڭ 600 تەڭگەگە دەيىن ءوسۋى مۇمكىن بە دەگەن سۇراققا جاۋاپ بەردى.
«ءبىز باعامدى بولجاپ وتىرعان جوقپىز، دوللاردىڭ قانشا تەڭگەگە دەيىن جەتەتىنىن بىلمەيمىن. بىزدە ەركىن اينالىمداعى كۋرس رەجيمى بار، كۋرس ديناميكاسى بويىنشا بولجام جاسامايمىز»، - دەدى ۆ. تۋتۋشكين سەنات كۋلۋارىندا.
ۇلتتىق بانك وكىلى كەشەگى كۇننىڭ قورىتىندىسى بويىنشا بيرجاداعى باعام ءبىر دوللار ءۇشىن 495 تەڭگە، ساۋدا-ساتتىق سوڭىندا - 496,3 تەڭگە بولعانىن ايتۋدا.
«جالپى، 500 - جاي عانا سان، وعان بايلانۋدىڭ قاجەتى جوق. بۇگىن 500، ەرتەڭ 600، كۋرس شەتەل ۆاليۋتاسىنا سۇرانىس پەن ۇسىنىستىڭ اراقاتىناسىنا قاراي قالىپتاسادى»، - دەپ تولىقتىردى سپيكەر.
سونداي-اق، ۆ. تۋتۋشكين دوللاردىڭ ءوسۋىنىڭ نەگىزگى فاكتورى ونىڭ الەمدىك نارىقتاردا نىعايۋى ەكەنىن اتاپ ءوتتى.
«دوللار دامۋشى جانە دامىعان ەلدەردەگى بارلىق ۆاليۋتالارعا قاتىستى نىعايىپ كەلەدى. ەگەر تەڭگە مەن ەۋرونىڭ اراقاتىناسىن قاراستىراتىن بولساق، وندا جاعداي اناعۇرلىم تۇراقتى»، - دەدى سپيكەر.
بۇگىن استانا مەن الماتى قالالارىنداعى اقشا ايىرباستاۋ پۋنكتتەرىندە دوللار 494-499 تەڭگە ارالىعىندا ساۋدالانىپ جاتىر.
