دەپۋتاتتار «كەلەشەك» جيناقتاۋ جۇيەسىن رەتتەيتىن زاڭدى قابىلدادى
استانا. KAZINFORM - ءماجىلىس زاڭنامانى اقپارات، قوعامدىق دامۋ، مادەنيەت جانە ارحيۆ ءىسى سالالارىنداعى نورمالاردىڭ ارتىق رەگلامەنتتەۋدەن ارىلتاتىن زاڭدى ەكىنشى وقىلىمدا قابىلداپ، سەناتقا جولدادى.
قۇجاتتىڭ سوڭعى رەداكسياسىن تانىستىرعان دەپۋتات قۇدايبەرگەن بەكسۇلتانوۆ وسى زاڭ ارقىلى «كەلەشەك» ءبىرىڭعاي ەرىكتى جيناقتاۋ جۇيەسىنىڭ قىزمەتىن رەگلامەنتتەيتىن قوسىمشا تۇزەتۋلەردى ەنگىزگەنىن اتاپ ءوتتى.
«بۇدان باسقا، كرەاتيۆتى يندۋستريانى دامىتۋعا جەرگىلىكتى اتقارۋشى ورگانداردىڭ، ۇكىمەتتىڭ جانە ۋاكىلەتتى ورگاننىڭ قۇزىرەتىن بەلگىلەۋ نورمالارى قارالدى. زاڭ جوباسى جۇمىس توپتارىندا جانە كوميتەتتىڭ كەڭەيتىلگەن وتىرىسىندا جان-جاقتى تالقىلاندى. جوبا بويىنشا قازاقستان رەسپۋبليكاسى پارلامەنت ءماجىلىسىنىڭ كوميتەتتەرى وڭ قورىتىندىلارىن بەردى»، - دەدى ول.
ەسكە سالساق، قۇجاتتىڭ ءبىرىنشى وقىلىمىندا «كەلەشەك» جوباسى ارقىلى جوعارى بىلىمگە اقشا جيناقتاۋدىڭ تەتىكتەرى ناقتىلانعان ەدى.
