دەپۋتات ىشكى تۋريزم تۋرالى: جولدار جۇپىنى، سەرۆيستىك قىزمەت جوق
استانا. KAZINFORM - ءماجىلىس دەپۋتاتى قايرات بالابيەۆ وتاندىق ءتۋريزمنىڭ دامۋىن سىنعا الدى.
«تۋريزم -الەمدىك ەكونوميكادا قارقىندى ءارى تابىستى بيزنەستىڭ ءبىرى. تەك تۋريزمنىڭ ارقاسىندا پايداعا كەنەلگەن ەلدەر بار. ال، قازاقستاننىڭ تۋريزمى - جولدارى جۇپىنى، جارىعى مەن بايلانىسى، سەرۆيستىك قىزمەتى جوق. سونىڭ كەسىرىنەن تاماشا تابيعاتتىڭ يگىلىگىن كورە الماي كەلەمىز. وزگە ەلدەر قوس قاباتتى اۆتوبۋس، قولايلى تاكسي، لاينەرمەن كرۋيز جاساتىپ جاتقاندا، بىزدە دالا تۇرماق، قالالاردىڭ ءوزى جاڭا اۆتوبۋستارعا جارىماي جاتىر. اۆتوپاركتەر دە ابدەن ەسكىرگەن»، - دەدى قايرات بالابيەۆ دەپۋتاتتىق ساۋالىن پرەمەر-ءمينيستردىڭ ءبىرىنشى ورىنباسارى رومان سكليارعا جولداي وتىرىپ.
ونىڭ ايتۋىنشا، جولاۋشى تاسىمالدايتىن اۆتوبۋستاردىڭ %66 توزىعى جەتىپ، قىزمەت ەتۋ مەرزىمى وتكەن.
«تۋريزم دامىعان الماتى مەن تۇركىستان قالاسى جانە وبلىس ورتالىقتارىندا جاڭا اۆتوبۋستار تاپشى. جەكە كولىك ەمەس، كوپشىلىككە ارنالعان اۆتوبۋس بولعاندىقتان ابدەن ەسكىرگەنى تاسىمال ساپاسىنا، قاۋىپسىزدىككە تىكەلەي اسەر ەتەدى، ال، ولاردان شىعاتىن گاز اۋاعا زيان. ەسكىرگەن اۆتوبۋستارمەن تۋريستەردى تاسىمالداۋ ۇيات ەمەس پە؟ جولداردىڭ سيقى سىن كوتەرمەيدى. شەتەلدەن كەلگەن قوناقتارعا جوعارعى دەڭگەيدە قىزمەت كورسەتىپ، بارىنشا قولايلى جاعداي جاساعاندا عانا ەلدەگى ءتۋريزمنىڭ دامۋىنا جول اشىلىپ، شەتەلدىكتەردى تارتا الامىز»، - دەيدى ول.
دەپۋتات كەلتىرگەن مالىمەتكە سايكەس، 2023 -جىلى ەل اۋماعىنداعى 7 زاۋىت نەبارى 3200 مىڭ اۆتوبۋس شىعارعان، ال جالپى اۆتوبۋس پاركىندەگى جاڭا اۆتوبۋستاردىڭ ۇلەسى %7,4.
«سونداي- اق، بۇل سالاعا مەملەكەت پەن كاسىپكەرلەر تاراپىنان ينۆەستيتسيالار جەتىسپەيدى. ال، كاسىپكەرلەرگە اۆتوبۋستاردى سىرتتان ساتىپ اكەلۋ ءتيىمدى ەمەس، ويتكەنى، الىم مەن كولىكتى باستاپقى تىركەۋدەن وتكىزۋ ءراسىمى يمپورتتىق اۆتوبۋستار ءۇشىن وتە قىمبات. تەك اۆتوبۋس ەمەس، جەڭىل كولىكتەردىڭ كەدەندىك راسىمدەرى، ءتۇرلى الىم- سالىمدارى جالپى كولىك باعاسىن 2-3 ەسە وسكەنى جاسىرىن ەمەس. جوعارىدا ايتىلعان ماڭىزدى ماسەلەلەردى ەسكەرە وتىرىپ، قازاقستانداعى ءتۋريزمنىڭ دامۋىنا تىكەلەي اسەرىن تيگىزەتىن وتاندىق اۆتوبۋس پاركىن جاڭارتۋ مەن ىشكى سۇرانىستى قامتاماسىز ەتۋ ماقساتىندا، قۇرمەتتى رومان ۆاسيليەۆيچ، سىزدەن باسقا مەملەكەتتەردەن اكەلىنەتىن جاڭا اۆتوبۋستاردى قايتا وڭدەۋ جيناعى مەن كولىكتى باستاپقى تىركەلۋدەن بوساتۋ تۋرالى شارالاردى قاراستىرۋلارىڭىزدى سۇرايمىن»، - دەپ قورىتىندىلادى قايرات بالابيەۆ.
