دەپۋتات: ولجاس بەكتەنوۆ - زيالى، ءبىراق وتە قاتال ادام، بۇگىندە ۇكىمەتكە جەتپەي جۇرگەن نارسە وسى
استانا. KAZINORM - «اق جول» قازاقستاننىڭ دەموكراتيالىق پارتياسىنىڭ ءتوراعاسى ازات پەرۋاشيەۆ پارتيالاستارىمەن بىرگە پرەمەر- مينيستر لاۋازىمىنا ولجاس بەكتەنوۆتىڭ كانديداتۋراسىن نەلىكتەن قولداعانىن ايتتى.
«بۇل شەشىم تەك ءوزىڭنىڭ ەرىك-جىگەرىڭە عانا ەمەس، پارلامەنتتىك كوپشىلىك ۇكىمەت باسشىسىن انىقتاعان كەزدەگى پارلامەنتاريزمنىڭ جالپى پرينتسيپتەرىنە دە بايلانىستى. ەكىنشى ماسەلە - ءبىز ولجاس اباي ۇلىن كوپ جىلدان بەرى مەملەكەتتىك قىزمەتتە، ناقتىراق ايتقاندا ەكونوميكادا، سىبايلاس جەمقورلىققا قارسى ءىس-قيمىل، كاپيتالدى قايتارۋ تۇرعىسىندا جۇمىس ىستەگەن ادام رەتىندە جاقسى بىلەمىز. ول سىبايلاس جەمقورلىققا قارسى ءىس- قيمىل اگەنتتىگىنىڭ باسشىسى كەزىندە كاپيتالدى قايتارۋ ماسەلەسىن بىرگە تالقىلاعان ەدىك»، - دەپ اتاپ ءوتتى ازات پەرۋاشيەۆ ءماجىلىستىڭ جالپى وتىرىسىنان.
ونىڭ اتاپ وتۋىنشە، ۇكىمەتتىڭ بۇعان دەيىنگى قۇرامى مەملەكەت باسشىسىنىڭ قىركۇيەكتەگى جولداۋىندا بەرىلگەن يندۋستريالاندىرۋ، ەكونوميكانى ونەركاسىپتىك پىشىنگە كوشىرۋ تاپسىرماسىن لايىقتى دەڭگەيدە پىسىقتاي المادى.
«ولجاس بەكتەنوۆ - زيالى، ءبىراق وتە قاتال ادام. بۇگىندە ۇكىمەتكە جەتىسپەيتىن دۇنيە - وسى. ادەمى باياندامالار جاسالىپ، ال سودان كەيىن ءبارى بيۋروكراتيالىق كابينەتتەردە باتىپ قالادى. قورىتىندىسىندا بيلىك ۆەرتيكالى جۇمىس ىستەمەيدى، اتقارۋشىلىق ءتارتىپ ءالسىز. مەنىڭشە، بەكتەنوۆتىڭ الدىندا تۇرعان مىندەتتەردىڭ ءبىرى - ەكونوميكالىق تۇرلەنۋدى جۇزەگە اسىرۋ، جاڭا ەكونوميكالىق مودەل قالىپتاستىرۋ جانە قاتاڭ اتقارۋشىلىق تارتىپكە قول جەتكىزۋ»، - دەدى ازات پەرۋاشيەۆ.
