دەپۋتات تاكسيدەگى جاعدايعا قاتىستى: ۇلتتىق قاۋىپسىزدىككە قاۋىپ توندىرەدى

استانا. KAZINFORM - ءماجىلىس دەپۋتاتى مارحابات جايىمبەتوۆ ءىرى تاكسي اگرەگاتورلارى الاتىن كوميسسيالاردىڭ مولشەرىن رەتتەۋگە قاتىستى ۇسىنىس ايتتى.

- سوڭعى جىلدارى نارىقتا سيفرلىق پلاتفورمالار ارتىپ جاتىر. ءبىراق، كولىك قىزمەتتەرى نارىعىندا ءبىز اۆتوبەكەتتەردىڭ ءىس جۇزىندە جوعالىپ كەتكەنىن، قالاارالىق تاسىمالداۋ كولەمىنىڭ ازايىپ بارا جاتقانىن بايقايمىز. تاكسي پاركتەرى ۇلكەيەدى نەمەسە بانكروتقا ۇشىرايدى. ءجۇز مىڭداعان قازاقستاندىق جۇرگىزۋشىلەر سيفرلىق تاكسي اگرەگاتتارىنا قاتتى تاۋەلدى بولدى. تولەنگەن ءاربىر جول اقىسىنىڭ ءبىر ءۇزىمىن وتاندىق جۇرگىزۋشى السا، قالعانىن سىرتتاعىلار الىپ وتىر. وسى كۇندەلىكتى تىرشىلىگىمىزبەن بىتە قايناسىپ كەتكەن ونلاين سەرۆيستىك تاكسي قىزمەتىنەن تاپقان تابىستاردىڭ بەلگىلى ءبىر پايىزى سىرتقا كەتىپ جاتىر. ءبىر قاراعاندا بارلىعىن شەتەلدىك تەحنوكراتتار جاساپ بەرىپ جاتىر عوي دەي سالۋعا بولادى. شىن مانىسىندە، ءبىز سولارعا تاۋەلدى بولۋ ارقىلى ىشكى قارجى اينالىمىندا وڭباي ۇتىلىپ جاتىرمىز، - دەدى مارحابات جايىمبەتوۆ پرەمەر-ءمينيسترىنىڭ ءبىرىنشى ورىنباسارى رومان سكلياردىڭ اتىنا جولداعان ساۋالىندا.

ونىڭ ايتۋىنشا، قازىرگى تاڭدا تسيفرلىق تاكسي پلاتفورمالارى 16 پايىزدان باستالىپ، قوسىمشا تاكسوپاركتەر تاعى %2-4 قوسىپ الادى.

- شىن مانىندە، تابىستىڭ كوپ بولىگى پلاتفورمالار مەن تاكسوپاركتەردىڭ كوميسسياسىنا كەتىپ، جۇرگىزۋشىلەردى كۇرەكتەپ اقشا تاۋىپ جاتىر دەپ ايتا المايمىز. شەتەلدىك پلاتفورمالار ءوز مۇمكىندىكتەرىن ءتيىمدى پايدالانىپ وتىر، نارىقتىڭ باسىم بولىگى سولاردا. ەلىمىزدە وتاندىق قوسىمشالارعا قولداۋ از، رەسۋرسى شەكتەۋلى بولعاندىقتان، ولار باسەكەگە توتەپ بەرە المايتىنىن بايقايمىز. باسەكە بولماعان سوڭ حالىقتىڭ تاڭداۋ مۇمكىندىگى تارىلىپ، ساپا مەن باعا ماسەلەسى دە شەشىلمەي تۇر. جەكە قابىلداۋلاردا حالىق تاكسي تاريفتەرىنىڭ نەگىزسىز قىمباتتاۋىن العا تارتادى. اسىرەسە، مەرەكە كۇندەرى نەمەسە كۇن رايى كۇرت وزگەرسە باعا بىردەن شارىقتاپ كەتەدى. بۇگىنگى تاڭدا شەتەلدىك تسيفرلىق پلاتفورمالار ەكونوميكالىق اينالىمنان جۇرگىزۋشىلەر مەن حالىقتى قوسا العاندا، ەل ەكونوميكاسىنا ينۆەستيتسيا سالماي-اق، ينفراقۇرىلىمدى دامىتپاي-اق ونداعان ميلليارد تەڭگە الىپ وتىر دەۋگە بولادى. وسىنداي جاعدايلار ەلىمىزدىڭ ۇلتتىق جانە ەكونوميكالىق قاۋىپسىزدىگىنە تىكەلەي قاۋىپ توندىرەدى، - دەدى دەپۋتات.

ونىڭ سوزىنە قاراعاندا، شەتەلدىك سيفرلىق پلاتفورمالاردىڭ نارىقتاعى مونوپوليالىق جاعدايى ونىڭ كىرىسىن باقىلاماي-اق قايتا ارتتىرۋعا مۇمكىندىك بەرىپ وتىر. سيفرلىق قىزمەتتەر سالاسىنداعى كوميسسيالىق ساياساتتى قايتا قاراپ، ۇلتتىق مۇددەنى قورعاۋدى كۇشەيتۋ - ۋاقىت تالابى.

- بىرىنشىدەن، قازاقستاندىق سيفرلىق قوسىمشالاردى قۇرۋعا قولداۋ كورسەتۋ كەرەك. تابىستى قازاقستاندىق تسيفرلىق پلاتفورمالاردى جۇمىسقا تارتۋ ماڭىزدى. ەكىنشىدەن، وسى نارىق ءۇشىن اسا ماڭىزدى ينفراقۇرىلىمدى - ەلدىڭ سيفرلىق كارتاسىن قۇرۋ قاجەت. ول ۇلتتىق قاۋىپسىزدىك تۇرعىسىنان دا ماڭىزدى، - دەدى مارحابات جايىمبەتوۆ.

سونىمەن قاتار ول ءىرى تاكسي اگرەگاتورلارى الاتىن كوميسسيالاردىڭ مولشەرىن باعالىق رەتتەۋدى تالاپ ەتۋ كەرەك، ياعني تاكسي پلاتفورمالاردىڭ كوميسسياسىن %3-5 دەيىن ءتۇسىرۋ قاجەت ەكەنىن ايتتى.

ەسكە سالساق، پوليتسيا كوشى-قون زاڭناماسىن بۇزعان 700 گە جۋىق شەتەلدىك تاكسي جۇرگىزۋشىسىن انىقتادى.