دەپۋتات تاعى ءبىر سالا قىزمەتكەرلەرىنىڭ جالاقىسىن كوتەرۋدى ۇسىندى
استانا. KAZINFORM - ءماجىلىس دەپۋتاتى جيگۋلي دايرابايەۆ بالىق شارۋاشىلىعى قىزمەتكەرلەرىنىڭ جالاقىسىن كوتەرۋدى ۇسىندى.
دەپۋتاتتىڭ ايتۋىنشا، قازىر بالىق شارۋاشىلىعى سالاسىنداعى 1400 سۋبەكت جىل سايىن 50 مىڭ توننا بالىق اۋلايدى جانە ونى وڭدەيتىن 72 كاسىپورىن جۇمىس ىستەيدى، سولاردىڭ ىشىندە تەك 17- ءسى جوعارى ستاندارتتارعا ساي بولىپ تۇر.
ال بالىق شارۋاشىلىعىمەن اينالىساتىن كاسىپورىنداردا شامامەن 12 مىڭعا جۋىق ادام ەڭبەك ەتەدى.
«سول مامانداردى دايارلايتىن بەس جوعارى وقۋ ورىنى بار. بۇل ۋنيۆەرسيتتەردە بىلتىر بولىنگەن 120 ءبىلىم گرانتىنىڭ تەك 20 سى يگەرىلگەن. جاستارعا بۇل سالا تارتىمدى بولىپ تۇرعان جوق، سەبەبى ەڭبەكاقى مولشەرى از جانە جۇمىس جاعدايى دۇرىس ۇيىمداستىرىلماعان»، - دەيدى دەپۋتات.
جيگۋلي دايرابايەۆتىڭ سوزىنشە، قاتارداعى قىزمەتكەرلەردىڭ ايلىعى - 120 مىڭ تەڭگە، ال جۇمىس ورنى قاجەت قۇرال جابدىقتارمەن تولىق قامتىلماعان.
«وسى سۇراقتاردى قولعا الاتىن، سالانى رەتكە كەلتىرەتىن بۇگىنگى كۇنگە دەيىن كوميتەتتىڭ باسشىسى دا ءالى تاعايىندالماعان. «بالىق باسىنان ءشىريدى» دەگەن ماقالدى وسى جەردە قولدانۋعا بولاتىن شىعار»، - دەيدى ول.
دەپۋتات اۋىل شارۋالىعى، قارجى مينيسترلىكتەرى قاتارداعى قىزمەتكەرلەردىڭ جالاقى مولشەرىن قايتا قاراپ، ونى كوتەرۋ بويىنشا جۇمىس اتقارۋى قاجەت ەكەنىن مالىمدەدى.
ەسكە سالايىق، بۇعان دەيىن مەتەورولوگتاردىڭ جالاقىسىن كوتەرۋ ۇسىنىلدى.
