دەپۋتات ماقسات تولىقباي تەمىرجول سالاسىن سىنعا الدى
بۇگىن ءماجىلىستىڭ جالپى وتىرىسىندا دەپۋتات ماقسات تولىقباي تەمىرجول سالاسىنداعى پروبلەمانى كوتەرىپ، «قازاقستان تەمىر جولى» كومپانياسىنىڭ باسشىلىعىن سىنعا الدى، دەپ حابارلايدى Kazinform.

«تەمىرجولدا قاشان ءتارتىپ ورنايدى؟ بۇرىنعى باسشىلار 30 جىلدا تەمىرجولدى تەك تابىس كوزىنە عانا اينالدىرعان. ەسكى قازاقستاننىڭ وكىلدەرى وسى سالانىڭ ءسولىن سورىپ، بىزگە تەك قاڭقاسىن عانا قالدىردى. بۇل سالادا ساپا مۇلدەم تومەن. ەسكى ۆاگوندار سۇيرەتىلىپ ءالى ءجۇر، تەمىرجول پاركىنىڭ 60 پايىزى توزعان. تەرەزەسى اشىلمايتىن، كونديتسيونەرى قوسىلمايتىن، قابىرعاسىندا تاراقاندار ورمەلەپ جۇرەتىن ەسكى ۆاگونداردىڭ وزىنە جاز كەزىندە بيلەت تاپپايسىڭ. سويتە تۇرا، بيلەتتى سۋبسيديالاۋعا جىل سايىن ميللياردتاردى ساناپ بەرەمىز. پويىزدىڭ ءجيى كەشىگۋى بولەك ماسەلە»، - دەدى م. تولىقباي.
ءوز كەزەگىندە كولىك ءمينيسترى مارات قارابايەۆ ەل بويىنشا 2567 ۆاگون بار ەكەنىن ايتتى.
«ولاردىڭ توزۋ دەڭگەيى - 49 پايىز. بيىل 50 جاڭا ۆاگون الدىق. قول قويىلعان كەلىسىمشارت اياسىندا كەلەر جىلى تاعى 100 ۆاگون بولادى. قوسىمشا 157 ۆاگون الۋ كەلىسىمىن پىسىقتاپ جاتىرمىز. سوندا، بيىل جانە الداعى جىلدا 300 دەن استام جاڭا ۆاگون قوسىلادى»، - دەدى م. قارابايەۆ.
ءمينيستردىڭ ايتۋىنشا، قول قويىلعان تاعى ءبىر شارت بويىنشا 2025 -جىلدان باستاپ ەۋروپاداعى ەڭ زاماناۋي Stadler كومپانياسىنىڭ جالپى سانى 537 ۆاگونىن الۋ جوسپارلانعان.
«بۇل تۇرعىدا 2567 ۆاگوننىڭ ۇستىنە 804 تەن استام جاڭا ۆاگون الۋعا قازىر قول قويىلىپ وتىر. قوسىمشا ۆاگون الۋ ماسەلەسىن ءالى پىسىقتايمىز»، - دەدى م. قارابايەۆ.