دەپۋتات ۇلىتاۋ وبلىسىندا كيىكتى اياۋسىز اتۋ وقيعاسىنا قاتىستى تەكسەرىس جاساۋدى سۇرادى

киік
Фото: Экология және табиғи ресурстар министрлігі

استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات ەربولات ساتىبالدين كيىكتى زاڭسىز قىرۋ ارەكەتتەرىنە توسقاۋىل قويۋعا قاتىستى ماسەلە كوتەردى.

بۇل رەتتە ول ەكولوگيا جانە تابيعي رەسۋرستار ءمينيسترى ەرلان نىسانبايەۆ پەن باس پروكۋرور بەرىك اسىلوۆتىڭ اتىنا ساۋال جولدادى.

«بىلتىردان «كيىكتىڭ سانى كوبەيىپ كەتتى، ەگىنگە تۇسەدى» دەگەن شارۋالاردىڭ ءۋاجىن ەستىپ جاتىرمىز. سول سەبەپتى 2024-جىلدان باستاپ كيىكتى ازايتۋعا مەملەكتتىك ورگانداردان رەسمي تۇردە رۇقسات بەرىلدى. الايدا قۇزىرلى ورىندار «ازايتۋ دەگەندى» دۇرىس تۇسىنبەگەن تۇسىنگەن سياقتى. تاياۋدا ۇلىتاۋ وبلىسى جاڭارقا اۋدانى قىزىلجار اۋىلى «وحوتزووپروم» ءو ب» قىزمەتكەرلەرىنىڭ كيىك سانىن ازايتۋ جەلەۋىمەن بۋاز كيىكتەردى اتىپ جاتقانى جەرگىلىكتى تۇرعىنداردىڭ نارازىلىعىن تۋدىردى. بۇل جەردە ەلدىڭ نارازىلىعى ورىندى. وبال مەن ساۋاپتى ايىرا بىلەتىن ەل، ىرگەسىندە بولىپ جاتقان مۇنداي سۇمدىققا شىداي الماعان. وسى رەتتە، ءسوز جوق، كيىكتەردىڭ پوپۋللياتسياسىن شارۋالارعا زيان تيدىرمەيتىندەي، حالىقتى ابىگەرگە سالمايتىنداي ەتىپ رەتتەۋ قاجەت»، - دەدى ە. ساتىبالدين.

ونىڭ پايىمىنشا، «وحوتزووپروم» ءو ب قىزمەتكەرلەرىنىڭ جاساعان بۇل قادامىنا قۇزىرەتتى ورىندار قۇقىقتىق باعاسىن بەرۋ كەرەك. سەبەبى، اتالعان مەكەمە قىزمەتكەرلەرى سالالىق مينيسترلىك قابىلداعان رەگلامەنتكە ساي جۇمىس اتقارماعانى بەلگىلى بولدى. رەگلامەنت بويىنشا اقبوكەندەر اۋىل ماڭىنا 10 شاقىرىم جاقىنداعاندا جاۋاپتى مەكەمە قىزمەتكەرلەرى ەلدى دۇرلىكتىرمەي، حالىققا ءبىرىنشى كەزەكتە قۇلاقتاندىرۋ، اقپاراتتاندىرۋ جۇمىستارىن جۇرگىزۋ كەرەك.

«ەكىنشىدەن، كيىكتىڭ پوپۋللياتسياسىن شەكتەۋ شارالارىن ورىنداۋ - جاپپاي قىرۋ ەمەس. اقبوكەندەر تابىنىن سانيتارلىق رەتتەۋ ءۇشىن اقساق-توقساعىن، كارى-قۇرتاڭىن، اۋرۋ-سىرقاۋىن ءبىرىنشى نىساناعا الۋ كەرەك.

ۇشىنشىدەن، كيىكتى بۋاز كەزىندە ازايتۋ شارالارىنا تىيىم سالۋ قاجەت. جوعارىداعى جايتتاردى ەسكەرە كەلە مىناداي ءتيىستى ۇسىنىستار بەرەمىز. ق ر باس پروكۋراتۋراسى ماسەلەنىڭ ءمانىن تەرەڭ قاراستىرىپ، «وحوتزووپروم» ءو ب قىزمەتكەرلەرىنىڭ ءىس-ارەكەتتەرىنە قۇقىقتىق باعاسىن بەرۋدى تالاپ ەتەمىز. ق ر ەكولوگيا جانە تابيعي رەسۋرستار مينيسترلىگىنە كيىك سانىن ازايتۋعا باعىتتالعان شارالاردى تولىق پىسىقتاپ، ءتيىستى رەگلامەنتكە وزگەرىستەر ەنگىزۋىن ۇسىنامىز»، - دەدى دەپۋتات.

سوڭعى جاڭالىقتار