دەپۋتات جاۋىنگەرلەردىڭ جالاقىسى تۋرالى: اسكەريلەر تاكسيست بولىپ قوسىمشا جۇمىس ىستەپ ءجۇر

миротворцы
Фото: пресс-служба Министерства обороны РК

  استانا. KAZINFORM – ق ر قورعانىس ءمينيسترىنىڭ ءبىرىنشى ورىنباسارى -قارۋلى كۇشتەرى باس شتابىنىڭ باسشىسى سۇلتان قامالەتدينوۆ جالاقىسى تومەن اسكەريلەردىڭ جۇمىسىنان تىس ۋاقىتىندا تاكسي قىزمەتىندە جۇرۋىنە قاتىستى پىكىر ءبىلدىردى.

بۇگىن پارلامەنت ماجىلىسىندە اسكەريلەردىڭ الەۋمەتتىك جاعدايىن جاقسارتۋ ماسەلەسىن تالقىلاۋ كەزىندە دەپۋتات كونستانتين اۆەرشين ءبىراز اسكەري قىزمەتشىلەردىڭ جالاقىسى تىم تومەن ەكەنىن ايتتى.

«مەملەكەت باسشىسى بىزدە زاماناۋي، جاقسى قارۋلانعان ارميا بولۋى كەرەكتىگىن قاداپ ايتتى. بۇل رەتتە، اسكەريلەردى الەۋمەتتىك جاعىنان قامتاماسىز ەتۋگە ەرەكشە نازار اۋدارۋ كەرەك. دەپۋتاتتار اسكەردەگى جاعدايمەن تانىسىپ شىقتى، ياعني ءبىز وسى ماسەلەگە قاتىستى كوشپەلى وتىرىستاردى تۇراقتى وتكىزىپ ءجۇرمىز. ماسەلەن، اتقىشتار بولىمىندەگى جاۋىنگەردىڭ بازالىق جالاقىسى 98 مىڭ تەڭگە شاماسىندا. تومەن جالاقىنىڭ سالدارىنان اسكەريلەر وتباسىن اسىراۋ ءۇشىن قوسىمشا تاكسيست بولىپ جۇمىس ىستەۋگە ءماجبۇر»، - دەدى ك. اۆەرشين پارلامەنتى ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ وتىرىسىندا.

وسى ورايدا ول اتالعان ماسەلەگە قاتىستى مەملەكەتتىك ورگاندار ناقتى ءارى دۇرىس ۇسىنىستار جاساۋى كەرەك ەكەنىن ايتتى.

كوميتەت وتىرىسىنان كەيىن تىلشىلەر ق ر قورعانىس ءمينيسترىنىڭ ءبىرىنشى ورىنباسارى سۇلتان قامالەتدينوۆكە اسكەريلەردىڭ تاكسيست رەتىندە قوسىمشا جۇمىس ىستەۋىنە قاتىستى سۇراق قويدى.

«ارينە، اسكەري قىزمەتشىلەر ءوزىنىڭ نەگىزگى جۇمىسىنان كەيىن دەمالۋى كەرەك. وسى ماسەلە تەك قورعانىس مينيسترلىگى مەن ۇكىمەتكە عانا قاتىستى ەمەس. بۇل ءبىزدىڭ جالپىۇلتتىق پروبلەمامىز جانە ونى بىرلەسىپ شەشۋ كەرەك»،- دەدى سۇلتان قامالەتدينوۆ.

بۇدان بۇرىن حابارلانعانداي، تەك 2020-2023 -جىلدار ارالىعىندا قارۋلى كۇشتەر قاتارىنان 17065 اسكەري قىزمەتشى بوساتىلدى.

بۇعان جالاقىنىڭ تومەن بولۋى جاعدايى اسەر ەتىپ وتىر.

اۆتور

رۋسلان عابباسوۆ

سوڭعى جاڭالىقتار