دەپۋتات پەدوفيلدەرگە حيرۋرگيالىق كاستراتسيا جاساۋدى ۇسىندى

елнұр бейсенбаев
Фото: Мәжіліс

استانا. KAZINFORM - بۇگىن ماجىلىستە بالالاردىڭ قاۋىپسىزدىگىن قامتاماسىز ەتۋ بويىنشا زاڭ جوباسىن تانىستىرۋ كەزىندە دەپۋتات ەلنۇر بەيسەنبايەۆ پەدوفيلدەرگە قاتىستى جازانى كۇشەيتۋدى ۇسىندى.

بۇل رەتتە ول بۇل قىلمىسقا قاتىستىلارعا حيرۋرگيالىق كاستراتسيا جاساۋ كەرەك ەكەنىن ايتتى.

اتاپ ايتقاندا، جاڭا زاڭ جوباسىندا پەدوفيليا ءۇشىن ءومىر بويىنا باس بوستاندىعىنان ايىرۋ جازاسى ەسكەرىلگەن.

«جاڭا رەداكسيادا ولاردى ءومىر بويىنا باس بوستاندىعىنان ايىرۋ جازاسى ۇسىنىلدى. AMANAT فراكسيا اتىنان دەپۋتاتتار حيرۋرگيالىق كاستراتسيا تۋرالى ۇسىنىس بەردى. دەگەنمەن، وسى نورماعا قاتىستى ۇكىمەت ناقتى ۇستانىمىن تانىتپادى جانە بۇل تۇزەتۋدى قولدامادى. بۇل رەتتە، ءتۇرلى دالەل كەلتىرىپ، وسىنداي قادام ادام قۇقىعى جونىندەگى كونۆەنتسياعا قايشى كەلەتىنىن مالىمدەدى. اتاپ ايتقاندا، ەۋروپانىڭ ءبىراز ەلىندە حيرۋرگيالىق كاستراتسيا بار. ءبىز پەدوفيلدەردى جاپپاي كاستراتسيالاۋ كەرەك دەپ ايتىپ تۇرعان جوقپىز. وسى شەشىمدى سوت قابىلداۋى ءتيىس. ەگەر پەدوفيليا اسا قاتىگەزدىكپەن جاسالسا، حيرۋرگيالىق كاستراتسيانى جاساۋ كەرەك دەپ سانايمىز»، - دەدى ە. بەيسەنبايەۆ.

ونىڭ ايتۋىنشا، 30-40 جىل وتكەننەن كەيىن وسى ادام تۇرمەدەن بوساپ شىعۋى مۇمكىن. سەبەبى سول كەزەڭدە جاڭا زاڭدار قابىلدانۋى ىقتيمال.

دەپۋتات ەلىمىزدە قازىر پەدافيلدەرگە قاتىستى حيرۋرگيالىق كاستراتسيانى ەنگىزۋ كەرەك ەكەنىن اتاپ ءوتتى.

«وسى ماسەلەنى ءالى دە پىسىقتاۋ قاجەت. ءبىز فراكسيا اتىنان وسى تۇزەتۋدى قايتا ۇسىنامىز»، - دەدى ەلنۇر بەيسەنبايەۆ.

ءوز كەزەگىندە ىشكى ىستەر ءمينيسترىنىڭ ورىنباسارى يگور لەپەحا بۇل اۋىر قىلمىسقا قاتىستىلارعا قازىر ەلىمىزدە حيميالىق كاستراتسيا جازاسى بار ەكەنىن ەسكە سالدى.

«جالپى، ىشكى ىستەر مينيسترلىگى حيرۋرگيالىق كاستراتسيا باعىتىندا جازانى كۇشەيتۋگە تۇبەگەيلى قارسى دەپ ايتا المايمىن. ەگەر ءبىزدىڭ پىكىردى سۇراسا، وسى ۇستانىمدى قولداۋعا دايىنبىز»، - دەدى ي. لەپەحا.

ەسكە سالا كەتەيىك، بىلتىر كۇزدە ءماجىلىس دەپۋتاتى اسحات ايماعامبەتوۆ پەدوفيلدەرگە قاتىستى تەك حيميالىق ەمەس، حۋرۋرگيالىق كاستراتسيانى دا ەنگىزۋ قاجەت ەكەنىن ايتقان ەدى.

سوڭعى جاڭالىقتار