دەپۋتات ءى ءى م-نەن بانك مەنەدجەرلەرىن الاياقتىق سحەمالارعا قارسى تەكسەرۋدى تالاپ ەتتى

استانا. KAZINFORM - ءماجىلىس دەپۋتاتى اسحات راحىمجانوۆ كرەديتپەن بايلانىستى الاياقتىق سحەمالارعا بانك مەنەدجەرلەرىنىڭ قاتىسى بار دەگەن مالىمەتى ايتتى.

- قازاقستاندا الاياقتىق تاسىلمەن ازاماتتاردىڭ اتىنا جۇيەلى تۇردە كرەديت رەسىمدەيتىن ۇيىمداسقان قىلمىستىق توپ جۇمىس ىستەپ كەلەدى. بۇل ماسەلەنىڭ اۋقىمى وراسان. وعان ماعان جانە پارتيامىزعا ءتۇسىپ جاتقان وتىنىشتەر دالەل بولا الادى.

شىعىس قازاقستان وبلىسىندا وسى سحەمانىڭ ارەكەتىنەن زارداپ شەككەن ازاماتتار ماعان جۇگىندى. بەلگىسىز نومىرلەردەن قوڭىراۋ شالعان ادامدار ازاماتتاردى جەكەلەگەن بانك فيليالدارىنا جىبەرىپ وتىرعان. ازاماتتار مەن ولاردىڭ تۋىستارىنا جالعان نەسيەلەر وسى فيليالدار ارقىلى بەرىلىپ كەلگەن. پارتيامىزدا ءبىز قۇقىق قورعاۋ ورگاندارىنا ۇسىناتىن وسىنداي قىزمەتكەرلەردىڭ ءتىزىمى بار، - دەيدى ول.

دەپۋتات وسى كۇماندى ادامداردى ىشكى ىستەر مينيسترلىگى تەكسەرۋ كەرەك دەپ ەسەپتەيدى.

- ىشكى ىستەر مينيسترلىگى ەكىنشى دەڭگەيدەگى بانك مەنەدجەرلەرىنىڭ قىزمەتىنە جان-جاقتى تەكسەرۋ جۇرگىزىپ، جالعان سەنىمحات ارقىلى كرەديت رەسىمدەۋ فاكتىلەرىنە قۇقىقتىق باعا بەرسىن. ءوز تاراپىمىزدان جوسىقسىز قىزمەتكەرلەردىڭ تولىق ءتىزىمىن ۇسىنامىز جانە تەرگەۋ شەڭبەرىندە، ونىڭ ىشىندە شىعىس قازاقستان وبلىسى بويىنشا ورگاندارمەن ءوزارا ءىس-قيمىل جاسايمىز، - دەدى اسحات راحىمجانوۆ.

ەسكە سالساق، قارجىلىق مونيتورينگ اگەنتتىگى الاياقتىقتىڭ جاڭا ءتۇرى پايدا بولعانىن ءمالىم ەتكەن بولاتىن.