دەپۋتات بيشىمبايەۆقا قاتاڭ جازا قولدانۋدى تالاپ ەتتى

ءماجىلىس دەپۋتاتى جۇلدىز سۇلەيمەنوۆا ۇكىمەت باسشىسىنىڭ اتىنا جولداعان دەپۋتاتتىق ساۋالىندا ءوز ايەلىن ءولتىردى دەگەن كۇدىككە ىلىنگەن ەكس-شەنەۋنىك قۋاندىق بيشىمبايەۆقا قاتاڭ جازا قولدانۋدى تالاپ ەتتى، دەپ حابارلايدى Kazinform.

«جەمقورلىق ءۇشىن سوتتالىپ، ارتىنان راقىمشىلىققا يە بولعان ەكس-شەنەۋنىك ءوز ايەلىن ءولتىردى دەگەن كۇدىك پەن جانتۇرشىگەرلىك اشىق اقپاراتتان قوعام دۇربەلەڭگە ءتۇستى. وتباسىلىق زورلىق-زومبىلىق، قاتىگەزدىك، پاتريارحالدىق وزبىرلىققا شىداماعان ايەلدەردىڭ جان داۋسىن ەستيتىن جانە قاتاڭ شارا قابىلدايتىن ۋاقىت جەتتى»، - دەدى ول.

دەپۋتات ايەل مەن بالاعا زورلىق-زومبىلىق كورسەتكەندەرگە اياۋشىلىق تانىتۋعا بولمايتىنىن ەسكە سالدى.

«ەشكىمنىڭ ايەل ادامداردى قورلاپ، ولتىرۋگە حاقىسى جوق. قىلمىسكەرگە قاتاڭ جازا بەرىلۋىن تالاپ ەتەمىز»، - دەدى ءماجىلىس دەپۋتاتى.

سونداي-اق ول زاڭناماداعى تۇرمىستىق زورلىق-زومبىلىقتىڭ الدىن الاتىن، قاتاڭ شارالار قابىلدايتىن جاۋاپتى مەملەكەتتىك ورگاندى بەكىتەتىن ۋاقىت جەتكەنىن ايتتى.

«ۇكىمەتتەن ايەلدەر قاۋىپسىزدىگىن قامتاماسىز ەتۋدە، اجىراسقان ايەلدەرگە اليمەنتتى ۋاقتىلى تولەۋگە باعىتتالعان ناقتى مەحانيزمدەردى ايقىندايتىن مەملەكەتتىك ساياساتتى بەكىتۋدى سۇرايمىز. وتباسىلىق زورلىق-زومبىلىقتى الدىن الۋ مەن كريمينالداندىرۋ ماسەلەلەرىن قاراستىرا وتىرىپ ازىرلەنگەن، ايەلدەردىڭ قۇقىعى مەن بالالاردىڭ قاۋىپسىزدىگىنە ارنالعان زاڭ تۇجىرىمداماسىن ماجىلىسكە تەز ارادا ەنگىزۋدى سۇرايمىز»، - دەدى جۇلدىز سۇلەيمەنوۆا.

دەپۋتات كەلتىرگەن دەرەككە سۇيەنسەك، 2021-جىلى ۇيدەگى زورلىق-زومبىلىقتىڭ تەك 40 پايىزى سوتقا جەتكەن.