دەپۋتات گازا سەكتورىنداعى قازاقستاندىقتارعا قالاي كومەكتەسۋگە بولاتىنىن ايتتى

 سەناتور نۋريا نيازوۆا پرەمەر- مينيستر ءاليحان سمايىلوۆتىڭ اتىنا جولداعان دەپۋتاتتىق ساۋالىندا جانجال ايماقتارىندا جۇرگەن قازاقستاندىقتارعا كومەكتەسۋگە قاتىستى ۇسىنىس ايتتى، دەپ حابارلايدى Kazinform.

دەپۋتات پالەستينا مەن يزرايلدەگى اسكەري- ساياسي جاعدايدىڭ كۇرت ۋشىعۋىنا بايلانىستى جايتتى مىسالعا كەلتىردى. سەناتور ق ر سىرتقى ىستەر مينيسترلىگى قازاقستان ازاماتتارىنىڭ قاۋىپسىز ايماقتارعا شىعارۋدى ۇيىمداستىرۋ جونىندە شارالار قابىلداپ جاتقانىن اتاپ ءوتتى.

«ءبىزدىڭ ازاماتتاردىڭ كوپشىلىگىندە بايلانىس بار، ءبىراق ەلشىلىگىمىزدىڭ وكىلدەرىنە قوڭىراۋ شالعان كەزدە، ولار بايلانىسقا قوماقتى سوما تولەپ جاتىر. ويتكەنى ولار روۋمينگ ارقىلى سويلەسىپ جاتىر. ولاردىڭ كوپشىلىگىندە مۇنداي سومانى تولەۋگە مۇمكىندىگى جوق. سونىمەن قاتار، سول ايماقتا روۋمينگى بار وپەراتورلارمەن ءبارى بىردەي بايلانىسا المايدى. سوندىقتان وسى ماسەلە بويىنشا ءتيىستى ءىس- شارالار ازىرلەنۋى كەرەك. وعان ءوزارا ناقتى الگوريتمى بار ءتۇرلى مينيسترلىكتەر جۇمىلدىرىلعانى ءجون»، - دەدى نۋريا نيازوۆا.

دەپۋتات اتالعان پروبلەما بويىنشا ءبىزدىڭ ازاماتتارىمىزدى روۋمينگتە قولداۋ مۇمكىندىگىن ۇيىمداستىرۋدى ۇسىندى. بۇل ماسەلەنى تەلەفون جانە باسقا دا بايلانىستاردى قامتاماسىز ەتەتىن كومپانيالارمەن پىسىقتاۋ كەرەك.

«سونىمەن قاتار، دەنساۋلىق ساقتاۋ مينيسترلىگى تەلەمەديتسينا ورتالىعى ارقىلى قيىن جاعدايعا تاپ بولعان ازاماتتارىمىزعا مەديتسينالىق- كونسۋلتاتسيالىق كومەك كورسەتۋ مۇمكىندىگىن ازىرلەۋى قاجەت. توتەنشە جاعدايلار مينيسترلىگى باسقا مەملەكەتتىك ورگاندارمەن بىرلەسە وتىرىپ، ءتيىستى حابار بەرۋ قادامدارىن مەسسەندجەرلەر مەن سمس جىبەرۋ ارقىلى ىسكە اسىرۋى كەرەك. سونداي- اق تسيفرلىق دامۋ مينيسترلىگى مەن ادىلەت مينيسترلىكتەرى شەكارا قىزمەتىمەن تىعىز بايلانىستا جۇمىس ىستەۋى ءتيىس. ياعني ازاماتتار مەملەكەتتىك شەكارانى كەسىپ ءوتۋ كەزىندە قايدا قوڭىراۋ شالىپ، قايدا اقپارات جىبەرۋ ءتيىس ەكەنى جونىندە، قالاي ارەكەت ەتۋ جانە ەۆاكۋاتسيالاۋعا قالاي دايىندالۋى كەرەكتىگى تۋرالى نۇسقاۋلىق پەن جادىناما جىبەرۋ مۇمكىندىگىن ازىرلەسىن»، - دەدى دەپۋتات سەناتور.

بۇدان بۇرىن حابارلانعانداي، ق ر سىرتقى ىستەر ءمينيسترىنىڭ ءبىرىنشى ورىنباسارى قايرات وماروۆ گازا سەكتورىنداعى قازاقستان ازاماتتارىنىڭ ناقتى سانىن ايتۋ مۇمكىن بولماي تۇرعانىن ايتتى.