دەپۋتات ارداق نازاروۆ قاي قىلمىستىق توپ قاتارلارىنا شاقىرعانىن ايتتى
استانا. KAZINFORM - ءماجىلىس دەپۋتاتى ارداق نازاروۆ Adal ADAM youtube ارناسىنا بەرگەن سۇحباتىندا قىلمىس الەمىنىڭ سەركەلەرى وزدەرىنىڭ قاتارىنا قوسىلۋعا شاقىرعانىن ايتتى.
«الماتىعا 1994-جىلى وقۋعا ءتۇسىپ، 1998-جىلى ءبىتىردىم. 2000-جىلدان باستاپ جارىسقا شىعا باستادىم. سول كەزدە «ءتورت اعايىندى»، «اتابا» اعالارىمىز وزدەرىنىڭ قاتارىنا كوپ شاقىردى. شىن مانىندە، اعالارىمىز عوي، قازاقتىڭ ۇلكەن اعالارى، قايتىس بولىپ كەتتى. ءبىزدى اقشاعا قىزىقتىردى. قاسىمداعى ءبىرتالاي جىگىت ءوز تاڭداۋلارىن جاساپ، ەرىپ كەتتى. سول ۋاقىتتا ءبارىمىز دە جىگىت بولعاننان كەيىن ويلار بولدى. ءبىراق مەن دۇرىس ەمەس باعىتقا بەت بۇرسام، كوز الدىما انامنىڭ جىلاعان بەينەسى مەن كىشكەنتاي ءىنىم، بەيبىتتىڭ بەينەسى كەلەدى ۇنەمى. سودان كەيىن مەنىڭ جولىم ەمەس دەگەن ويعا كەلەم.
«1994-جىلى مەنىڭ قاتارلاستارىم الماتىداعى قاجىمۇقان سپورت مەكتەبىنە ءتۇستى. سول جىگىتتەردىڭ ەشقايسىسى وقۋدى بىتىرمەدى. كوبىسى دۇرىس ەمەس جولعا ءتۇستى، تۇرمەگە قامالدى. كوپ بالا سولاي شاتاسىپ قالدى. ال مەن قۇرىلىس كوللەدجىنە ءتۇستىم دە، ول بالالارمەن ارالاسپاي قالدىم. كەيىن ءوزىم سپورتپەن جەكە كەتتىم. جاستار ەلىكتەيتىن جول ەمەس. ول جولدا مىندەتتى تۇردە بىرەۋگە قيانات جاسايسىڭ، بىرەۋدىڭ دۇنيەسىن تارتىپ الاسىڭ، بىرەۋدى ۇراسىڭ، بىرەۋدىڭ بەلىن سىندىراسىڭ. ال قيانات جاساعان ادامنىڭ ارتىندا كىم تۇر، اناسى تۇر. ول سەنى قارعايدى، ال قارعاعاننان كەيىن سەن ومىردە سونىڭ كەيپىن كەشەسىڭ نەمەسە باسقا جاعدايعا دۋشار بولاسىڭ»، - دەدى دەپۋتات.
ارداق نازاروۆتىڭ ايتۋىنشا، 1990-جىلدارى جانە 2000-جىلداردىڭ باسىندا الماتىعا جىگىتتەر توپ-توپ بولىپ كەلىپ، قىلمىستىق توپتارعا قوسىلىپ، ءومىرىن قۇرتتى. كوبى قازا بولىپ، تۇرمەگە ءتۇستى.
«اتابا»، «ءتورت اعايىندى»، «سارى الماس»، «قارا الماس» سياقتى اعالارىمىزدىڭ قاسىندا دانا ۇستازدار بولىپ، باتىرلارىمىزدىڭ ەنەرگياسىن جاقسىلىققا، ەلگە قىزمەت جاساۋعا بۇرعاندا عوي، قانشاما ءىس بىتىرەتىن ەدى. دەگەنمەن زامان سونداي بولدى. ولاردىڭ جىگىتتىك شاعى اۋمالى-توكپەلى زامانعا ساي كەلىپ، وسى جولدى تاڭداپ كەتتى. ول زامانعا دا ءبىز سىن ايتا المايمىز»، - دەدى ارداق نازاروۆ.
