دەسترۋكتيۆتى ناسيحاتتارعا ءبىزدىڭ ەلىمىزدەگى بالالار دا ىلەسىپ كەتىپ ءجۇر - مەملەكەت باسشىسى

استانا. KAZINFORM - ۇلتتىق قۇرىلتايدىڭ ءۇشىنشى وتىرىسىندا سويلەگەن سوزىندە پرەزيدەنت قاسىم-جومارت توقايەۆ داستۇرىمىزگە جات ءدىني نانىم-سەنىم مەن مادەنيەت تۋرالى ايتتى.

«ءبىز حالقىمىزدىڭ رۋحاني نەگىزىن قۇرمەتتەي وتىرىپ، مەملەكەتىمىزدىڭ زايىرلى ەل رەتىندەگى مارتەبەسىن كۇشەيتە ءتۇسۋىمىز كەرەك. قازاقستان ءوزىنىڭ مەملەكەتتىلىگىنە جانە قوعامدىق مورالىنا قايشى كەلمەيتىن ءدىني نانىم- سەنىمدەردىڭ، ءتۇرلى تانىمدار مەن ىلىمدەردىڭ بارىنە تۇسىنىستىكپەن قارايدى. ءبىراق ءبىز باتىستىڭ، يا بولماسا باسقا دا كوزقاراس يەلەرىنىڭ ىقپالىمەن ءتول مادەنيەتىمىزگە جات ءارى الەمنىڭ دۋاليستىك نەگىزىنە كەرەعار قۇندىلىقتاردى ناسيحاتتاۋشىلاردىڭ جەتەگىنە ەرىپ كەتە المايمىز، كەتپەيمىز دە!»، - دەدى پرەزيدەنت.

مەملەكەت باسشىسى سوزىندە، دەسترۋكتيۆتى ناسيحاتتارعا ءبىزدىڭ ەلىمىزدەگى بالالار دا ىلەسىپ كەتىپ جۇرگەنىن اتاپ ءوتتى. سوندىقتان مۇنىڭ زارداپ-زالالى وتە زور بولۋى مۇمكىن. تارازى باسىندا وسكەلەڭ ۇرپاقتىڭ رۋحاني جاعىنان ساۋ- سالاماتتى بولۋ ماسەلەسى تۇر. ءبىزدىڭ وسىعان قاتىستى ۇستانىمىمىزعا ساياسي احۋال دا، جەر جۇزىندە سانگە اينالعان جاڭا ۇردىستەر دە اسەر ەتە المايدى.

«ءبىز ءداستۇرلى وتباسى قۇندىلىقتارىن تاباندى تۇردە ورنىقتىرا بەرۋىمىز قاجەت. يسلام قاعيدالارىن ورەسكەل بۇرمالاپ، قاتىپ قالعان دوگما رەتىندە قابىلدايتىن وتباسىلارداعى ايەلدەردى كەمسىتۋ، ءتىپتى قورلاۋ فاكتىلەرىنە ەرەكشە نازار اۋدارعان ءجون. مۇنداي وتباسىلاردىڭ تۇرمىس- تىرشىلىگى عىلىم مەن تەحنيكانىڭ جەتىستىكتەرىنە تولى XXI عاسىردىڭ ءومىر سالتىنا مۇلدە ۇيلەسپەيتىن سوراقى تىيىمدار مەن تارتىپتەرگە نەگىزدەلگەن. كەيبىر ادامدار ادەيى كەرى كەتۋدى قالاپ، ورتا عاسىرلارعا ءتان ەسكى تانىم- تۇسىنىك پەن ءىس- ارەكەتكە بوي ۇراتىن سياقتى كورىنەدى»، - دەدى مەملەكەت باسشىسى.

اۆتور

ايدار وسپاناليەۆ