دەرەكتەردى ۇرلايدى: ەسكى تەلەفون ساتىپ الۋ نەسىمەن قاۋىپتى؟
استانا. قازاقپارات - بۇگىندە ادامدار مۇلدە قولدانىلماعان جاڭا زاتىن دا، بىرنەشە جىل تاستاماعان ەسكىرگەن زاتىن دا ساتىپ جاتادى. ونىڭ اراسىندا ەسكى تەلەفوندار دا بار.

دەگەنمەن ماماندار ەسكى گادجەت ساتىپ الماۋعا كەڭەس بەرەدى. نەگە؟ ماسساگەت ءتىلشىسى IT- مامانى داۋلەت سەرىكبايەۆتان ەسكى تەلەفون ساتىپ الۋ نەسىمەن قاۋىپتى ەكەنىن سۇرادى.
ماماننىڭ ايتۋىنشا، الاياقتار قاساقانا ۆيرۋسى بار تەلەفوندى ساتىپ، وسىلايشا جاڭا قۇرىلعى يەسىنىڭ جەكە دەرەكتەرىن ۇرلاۋعا تىرىسادى. مۇنداي باعدارلاما كوبىنەسە قاراپايىم قوسىمشا سياقتى جاسىرىلادى.
«ەسكى تەلەفون ساتىپ الۋ بەلگىلى ءبىر قاۋىپتەرمەن بايلانىستى. ەگەر دۇرىس تەكسەرمەسەڭىز نەمەسە الدىڭعى يەسىنىڭ دەرەكتەرى جويىلماسا، جەكە اقپاراتتىڭ ۇرلانۋ قاۋپى بار»، - دەدى ول.
داۋلەت سەرىكبايەۆ ەسكى تەلەفون ساتىپ الۋدىڭ نەگىزگى قاۋىپتەرىن ءتىزدى:
1. جاسىرىن زياندى باعدارلامالار. تەلەفوندا بۇرىنعى يەسى ورناتقان شپيوندىق باعدارلامالار بولۋى مۇمكىن. ولار ءسىزدىڭ قوڭىراۋلارىڭىزدى، حابارلامالارىڭىزدى جانە بانك قوسىمشالارىڭىزدى باقىلاۋعا مۇمكىندىك بەرەدى.
2. جاڭا قولدانۋشىنىڭ جەكە دەرەكتەرىن ۇرلاۋ. ەگەر تەلەفونعا زياندى باعدارلامالىق جاساقتاما ورناتىلعان بولسا، جاڭا قولدانۋشىنىڭ دەرەكتەرى (لوگيندەر، قۇپياسوزدەر، بانك كارتالارى) حاكەرلەرگە جىبەرىلۋى مۇمكىن. سونداي-اق قۇرىلعى بۇرىنعى يەسىنىڭ Google نەمەسە Apple ID اككاۋنتىنا تىركەلگەن بولسا، ول ونى قاشىقتان باسقارا الادى.
3. «قارا تىزىمدەگى» تەلەفوندار. كەيبىر تەلەفوندار ۇرلانعان نەمەسە جوعالعان قۇرىلعى بولۋى مۇمكىن. ەگەر قۇرىلعى IMEI-گە بايلانىستى «قارا تىزىمگە» ەنگىزىلسە، ونى ۇيالى جەلىگە قوسۋ مۇمكىن ەمەس. بۇرىنعى يەسى تەلەفوندى وپەراتور ارقىلى بۇعاتتاپ تاستاۋى مۇمكىن.
4. بۇرىنعى يەسىنىڭ دەرەكتەرىنىڭ دۇرىس جويىلماۋى. ەگەر تەلەفونداعى مالىمەتتەر تولىق پىشىمدەلمەسە، بۇرىنعى يەسىنىڭ فوتولارى، نومىرلەرى نەمەسە تىركەلگەن پاراقشالارى قالۋى مۇمكىن. كەيبىر جاعدايلاردا جويىلعان دەرەكتەر قالپىنا كەلتىرىلۋى ىقتيمال.
تاجىريبەدە مۇنداي وقيعالار تىركەلگەن بە؟
مامان ومىردە ەسكى تەلەفون ارقىلى قۇرىلعىنىڭ جاڭا يەسىنىڭ دەرەكتەرىن ۇرلاۋ جاعدايلارى كەزدەسكەنىن ايتادى.
«2015 -جىلى ا ق ش-تاعى زەرتتەۋشىلەر جويىلعان دەرەكتەردى قالپىنا كەلتىرۋ ارقىلى بۇرىنعى يەلەردىڭ جەكە اقپاراتىن قايتا الا العان. كەيبىر كيبەرشابۋىلشىلار قولدانىلعان تەلەفونداردى ساتىپ الىپ، ىشىندەگى اقپاراتتى قالپىنا كەلتىرۋ ارقىلى الاياقتىق جاسايدى»، - دەدى ول.
قاۋىپسىزدىك ءۇشىن نە ىستەۋ كەرەك؟
داۋلەت سەرىكبايەۆ ساتىپ الىنعان قۇرىلعىنى ءاردايىم زاۋىتتىق كۇيىنە كەلتىرۋگە كەڭەس بەردى.
«ەگەر ءسىز سمارتفوندى رەسمي حابارلاندىرۋ سايتتارى ارقىلى ساتىپ الىپ جاتساڭىز، بايلانىسۋ ءۇشىن وزگە مەسسەندجەرلەردى مۇلدەم قولدانباڭىز. تولەم مەن جەتكىزۋ تاقىرىبى تەك حابارلاندىرۋ سايتىنىڭ حات الماسۋ بولىمىندە تالقىلانۋعا ءتيىس»، - دەدى IT-مامان.
سونىمەن قاتار مامان ۇيالى سمارتفوندى قولدان ساتىپ الۋ كەزىندە جارنامانىڭ ءوزىن، ءپروفيلىن زەرتتەۋ جانە ونىڭ سايتتاعى رەيتينگىن باقىلاۋ وتە ماڭىزدى ەكەنىن ايتادى. تەلەفوندى تەكسەرۋ بارىسىندا ونىڭ زاۋىتتىق پارامەترلەرىن قالپىنا كەلتىرىپ، جادىندا ەشقانداي دەرەك قالماعانىنا كوز جەتكىزگەن دۇرىس.
IMEI-كودتى تەكسەرىڭىز (imei.info ارقىلى)؛
دەرەكتەردى ارىلتىپ (Hard Reset) جانە جاڭا وپەراتسيالىق جۇيە ورناتىڭىز؛
بۇرىنعى تىركەۋلىك جازبانىڭ بايلانىسىن الىپ تاستاڭىز (Google, Apple ID)؛
انتيۆيرۋس ورناتىپ، كۇدىكتى قوسىمشالاردى ىزدەڭىز.