دەربەس كاسساتسيالىق ينستانسيا قۇرىلسا، ەلدىڭ سوتقا دەگەن سەنىمى ارتا تۇسەدى - سەنات
استانا. KAZINFORM - سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ دەپۋتاتتارى كاسساتسيالىق سوت قۇرۋ ماسەلەسى تۋرالى وتىرىس وتكىزدى.
كوميتەت ءتوراعاسى نۇرلان بەكنازاروۆ مەملەكەت باسشىسى قاسىم-جومارت توقايەۆ وتكەن جىلدىڭ قىركۇيەك ايىندا قازاقستاندىق بيزنەسمەندەرمەن كەزدەسۋ بارىسىندا ازاماتتاردىڭ قۇقىقتارىن ساپالى قورعاۋدى قامتاماسىز ەتۋ ءۇشىن جەكەلەگەن كاسساتسيالىق سوتتار قۇرۋدىڭ ماڭىزىن اتاپ وتكەنىن ەسكە سالدى.
«بۇگىندە قىلمىستىق جانە ازاماتتىق ىستەردىڭ تەك %5 كاسساتسياعا تۇسەدى جانە بۇل ازاماتتاردىڭ سۇرانىسىنا ساي كەلمەيدى. وسىعان بايلانىستى زاڭگەرلەر جانە كاسىپكەرلەر قاۋىمداستىعىمەن دەربەس كاسساتسيالىق ينستانتسيا قۇرۋ ماسەلەسى بويىنشا اقىلداستىق تۇرعىسىندا كەڭەسۋ قاجەتتىگى تۋىندادى. پارلامەنت دەپۋتاتتارىن ەلىمىز پرەزيدەنتىنىڭ زاڭدىلىق پەن قۇقىقتىق تارتىپكە قول جەتكىزۋگە ىقپال ەتەتىن ءتيىمدى سوت جۇيەسىن قۇرۋدى كوزدەيتىن تاپسىرمالارىن زاڭنامالىق تۇرعىدا قامتاماسىز ەتۋ جونىندە اۋقىمدى جۇمىس كۇتىپ تۇر»، - دەدى سەناتور.
سەناتور جاننا اسانوۆا ءوز كەزەگىندە تاۋەلسىز كاسساتسيالىق ينستانتسيا قۇرۋ سوت تورەلىگىنىڭ ساپاسىن جانە ازاماتتاردىڭ جالپى سوتتارعا دەگەن سەنىم دەڭگەيىن ارتتىرۋعا ىقپال ەتەتىنىن اتاپ ءوتتى.
سونداي-اق پارلامەنت پەن جوعارعى سوتتىڭ الدىندا تاۋەلسىز كاسساتسيالىق سوتتاردىڭ وڭتايلى نۇسقاسىن ەنگىزۋ جانە زاڭنامالىق تۇرعىدان بەكىتۋ مىندەتى تۇرعانىن جەتكىزدى.
شارا بارىسىندا جوعارعى سوتتىڭ ازاماتتىق ىستەر جونىندەگى سوت القاسىنىڭ ءتوراعاسى نۇرسەرىك ءشارىپوۆ، باس پروكۋراتۋرانىڭ، رەسپۋبليكالىق ادۆوكاتتار القاسىنىڭ، «قازاقستان زاڭگەرلەر وداعى» رەسپۋبليكالىق قوعامدىق بىرلەستىگىنىڭ، جوعارعى سوت جانىنداعى سوت تورەلىگى اكادەمياسىنىڭ وكىلدەرى، عالىمدار جانە باسقالار ءوز ۇسىنىستارىن ءبىلدىردى.
وتىرىس بارىسىندا قاتىسۋشىلار تاراپىنان بەرىلگەن ۇسىنىستار پارلامەنتتەگى سوت جۇيەسىنىڭ ماسەلەلەرى بويىنشا ءتيىستى زاڭ جوبالارىمەن جۇمىس كەزىندە قارالادى.
