دەربەس دەرەكتەردىڭ تاراپ كەتۋىنەن 100 پايىز قورعالعان ەل جوق - مينيسترلىك

سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى اقپاراتتىق قاۋىپسىزدىك كوميتەتىنىڭ ءتوراعاسى رۋسلان ءابدىقالىقوۆ قازاقستاندىقتاردىڭ دەربەس دەرەكتەرى شەتەلدىك Telegram-بوتتا تاراپ كەتۋىنە پىكىر ءبىلدىردى، دەپ حابارلايدى قازاقپارات ءتىلشىسى.

дербес деректер
Фото: Фото: Pixabay

«قازىرگى زاڭنامادا دەربەس دەرەكتەردى قورعايتىن نورمالار بارشىلىق. ماسەلە زاڭنىڭ جەتكىلىكتى دەڭگەيدە جاقسى بولماۋىندا ەمەس، ونداعى تالاپتاردىڭ قانشالىقتى ورىندالىپ وىترعانىندا. ءبىز ۇ ق ك- داعى ارىپتەستەرىمىزگە سۇراۋ سالعانبىز، ولار تالداۋ جاساپ ءبىتىردى. بۇل — وسىنداي جالعىز وقيعا ەمەس. ءار كەزدە ءارتۇرلى جۇيەدەن دەربەس دەرەكتەر قولدى بولعان»، — دەدى ول «Amanat» پارتياسى وتكىزگەن باسپا ءسوز ءماسليحاتىندا.

ونىڭ ايتۋىنشا، سوڭعى وقيعادا كوپتەگەن ازاماتتىڭ جەكە دەرەگى تاراپ كەتكەنىمەن، ەشكىمنەن رەسمي شاعىم تۇسپەگەن.

«بىزگە تولىعىراق مالىمەت بەرىلۋى كەرەك. سودان كەيىن مەملەكەتتىك باقىلاۋ باعىتىندا جۇمىس باستايمىز. اقپاراتتىق جۇيە يەلەرىنە شىعىپ، دەربەس دەرەكتەردى قالاي قورعاپ وتىرعانىن تەكسەرەمىز. دەربەستەردىڭ تاراپ كەتۋىنەن 100 پايىز ساقتاندىرىلعان ەل جوق. بۇگىن 100 پايىز ساقتاندىرىلدى دەگەننىڭ وزىندە ەرتەڭ ونى بۇزاتىن ءبىر امال تابىلۋى مۇمكىن. سوندىقتان ونداي جايتقا ءاردايىم دايىن بولۋىمىز كەرەك. دەرەكتەر تاراپ كەتتى مە، ول ارنانى الاياقتاردىڭ قولىنا تيمەي تۇرىپ جابۋ قاجەت. ءسىز ايتىپ وتىرعان جايتتان كەيىن نەشە شاعىم ءتۇستى دەپ ويلايسىز؟ ءبىر دە ءبىر شاعىم بولعان جوق. بۇل ازاماتتاردىڭ دەربەس دەرەگىنىڭ تاراپ كەتۋىنەن قانداي پروبلەما تۋىندايتىنىن بىلمەيتىنىن كورسەتەدى»، — دەدى رۋسلان ءابدىقالىقوۆ.

ەسكە سالايىق، سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى شەتەلدىك Telegram-بوتتا قازاقستاندىقتاردىڭ دەربەس دەرەكتەرى رۇقساتسىز جاريالانعانىن راستاعان ەدى.

سوڭعى جاڭالىقتار