دەربەس دەرەكتەردى قورعاۋ: 28 telegram-بوت بۇعاتتالدى
سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى كەيبىر تەلەگرام- بوتتاردا جەكە مالىمەتتەردىڭ تارالۋ وقيعاسىنا تۇسىنىك بەردى، دەپ حابارلايدى Kazinform.
«بۇل Telegram-بوتتاردىڭ جۇمىسى Facebook, Telegram, WhatsApp, ودنوكلاسسنيكي سىندى ءارتۇرلى ونلاين-پلاتفورمالاردىڭ سەرۆيستەرىنەن دەربەس دەرەكتەردى جيناۋعا ارنالعان»، - دەلىنگەن سيفرلىق دامۋ مينيسترلىگىنىڭ Kazinform اگەنتتىگىنە بەرگەن جاۋابىندا.
سونىمەن قاتار، telegram-بوتتار تۇرعىلىقتى مەكەنجايلار تۋرالى بۇرىنعى اقپاراتتى كورسەتىپ جاتىر. كەيبىر ادرەستەر جالپىعا بىردەي تارالعان سەرۆيستەردە نەمەسە تاۋار جەتكىزۋ قىزمەتتەرىندە كورسەتىلگەن بولۋى مۇمكىن. بۇل تۇرعىدا اتالعان telegram-بوتتار بۇرىن تارالىپ كەتكەن دەربەس دەرەكتەردى قامتيتىن بازالاردان اقپارات الادى، سونداي- اق رەسمي سەرۆيستەردىڭ وسال تۇتاستارىن پايدالانا وتىرىپ، مالىمەت جيناقتايدى.
«قازاقستان رەسپۋبليكاسى ازاماتتارىنىڭ دەربەس دەرەكتەرىنە قول جەتكىزۋگە مۇمكىندىك بەرەتىن telegram-بوتتارىنا قاتىستى جۇرگىزىلىپ جاتقان جۇمىستارعا توقتالساق، قازىر Telegram اكىمشىلىگىمەن ءوزارا ءىس-قيمىل بارىسىندا 28 telegram-بوت بۇعاتتالعان. بيىلعى 28-قازاندا ازاماتتاردىڭ دەربەس دەرەكتەرىنە قاۋىپ توندىرگەن telegram-بوت بۇعاتتالدى»، - دەپ اتالىپ وتكەن مينيسترلىك اقپاراتىندا.
ەسكە سالساق، بيىل كۇزدە ءماجىلىس وتىرىسىندا دەپۋتات نيكيتا شاتالوۆ كەيبىر تەلەگرام-بوتتاردا جەكە مالىمەتتەردىڭ تارالۋى انىقتالعانىن ايتقان ەدى.
