دۇربەلەڭ بولادى دەپ ويلامادىق - ايدا بالايەۆا «ءمىرجاقىپ. ويان، قازاق!» فيلمى تۋرالى

ق ر مادەنيەت جانە اقپارات ءمينيسترى ايدا بالايەۆا «ءمىرجاقىپ. ويان، قازاق!» فيلمىنىڭ پروكاتى جونىندە پىكىر ءبىلدىردى، دەپ حابارلايدى Kazinform.

«بارلىق كينوپروكات ۇيىمدارىنىڭ ءوز كەستەسى بار. ءبىز مۇنداي دۇربەلەڭ بولادى دەپ ويلامادىق جانە بەلگىلى ءبىر ۋاقىت ارالىعىن تاڭدادىق. كورەرمەندەر تاراپىنان وسى فيلمگە قىزىعۋشىلىق ارتقان سوڭ، پروكاتتى تاعى ءبىر اپتاعا ۇزارتتىق. قازىر پروكات ۋاقىتى اياقتالدى. ءوز كورەرمەنىن كۇتىپ وتىرعان باسقا دا فيلمدەر بار. سوندىقتان بۇل جەردە ەش ماسەلە جوق دەپ ويلايمىن»، - دەدى ايدا بالايەۆا ۇكىمەتتە وتكەن بريفينگىدە.

ءوز جاۋابىندا مينيستر بۇل كارتينانىڭ ۇلتتىق ارنادا ءۇش رەت كورسەتىلگەنىن ەسكە سالدى.

«سول كەزدە حالىق اسقان قىزىعۋشىلىق تانىتپاپ ەدى. ەندى بۇل فيلم كوپشىلىككە قولجەتىمدى جانە ۇلتتىق ارنانىڭ YouTube ارناسىنان سەريالىن كورۋگە بولادى. مەن مۇندا ەشقانداي پروبلەما كورىپ وتىرعان جوقپىن»، - دەدى ايدا بالايەۆا.

ەسكە سالساق، اتالعان «ءمىرجاقىپ. ويان، قازاق!» اتتى مينيسەريالدىڭ قىسقارتىلعان نۇسقاسى 21- قىركۇيەكتەن باستاپ قالىڭ جۇرتشىلىققا جول تارتتى.

كەيىنىرەك كينو پروكاتى تاعى ءبىر اپتاعا سوزىلدى.