دۇنيەجۇزىلىك تۋريستىك ۇيىم قازاقستانداعى ۇزدىك تۋريستىك اۋىلدى انىقتادى

 UNWTO دۇنيەجۇزىلىك تۋريستىك ۇيىمى قازاقستاندىق ساتى اۋىلىن ۇزدىك تۋريستىك اۋىل دەپ تانىدى. باس اسسامبلەيانىڭ Best tourism Villages by UNWTO 2023 سالتاناتتى ءىس-شاراسى كورشىلەس سامارقاندتا ءوتتى. بۇل تۋرالى Kazinform ق ر تۋريزم جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى. 

ايتا كەتەيىك، UNWTO-نىڭ «ۇزدىك تۋريستىك اۋىلدار» باعدارلاماسى 2021 -جىلى ىسكە قوسىلعان. ول ءتۋريزمدى اۋىلدىق اۋماقتاردىڭ دامۋى مەن ءال-اۋقاتىنىڭ قوزعاۋشى كۇشىنە اينالدىرۋعا باعىتتالعان.

ساتى - «كولساي كولدەرى» ۇلتتىق ساياباعىندا (الماتى وبلىسى) ورنالاسقان. وندا تۋريستىك نىساندار مەن اتتاس كولدەر توبى جانە قايىڭدى كولى بار.

قازىرگى ۋاقىتتا ساتى قوناقۇيلەر سانى بويىنشا ەلىمىزدەگى كوشباسشى اۋىلداردىڭ ءبىرى سانالادى. بۇل - جەرگىلىكتى تۇرعىنداردىڭ كەلەلى ىسكە بەلسەندى قاتىسۋىنىڭ ناتيجەسى.

سونىمەن قاتار كەيىنگى 5 جىلدا مۇندا ىڭعايلى مارشرۋتتار مەن سەرۋەن جولدارى قۇرىلعان، تومەنگى كولسايعا جول سالىنعان. اۋدان كولەمىندە ادامدار توقتاپ دەم الاتىن ورىندىقتار، اربالار مەن ايلاقتار بار. باقىلاۋ نۇكتەسىنەن كول ايدىنىنىڭ پانورامالىق كورىنىسىن تاماشالاۋعا بولادى.

«قازاقستاندا ساتىنىڭ تابىستى تاجىريبەسىن تاراتۋ ماقساتىندا قازاقستاندىق تۋروپەراتورلار مەن باسقا وڭىرلەردەن كەلگەن ءقوناقۇي يەلەرى ءۇشىن اقپاراتتىق تۋرلار، وقىتۋ ترەنينگتەرى مەن سەمينارلار وتكىزىلەدى. 2023 -جىلعى ەسەپ بويىنشا ساتىدا 90 قوناق ءۇي مەن 30 ورنالاسۋ ورنى جۇمىس ىستەيدى. بۇل سان 2019 -جىلمەن سالىستىرعاندا ەكى ەسە وسكەن. جەرگىلىكتى تۇرعىنداردىڭ كوپشىلىگى تۋريستىك بيزنەسپەن اينالىسادى»، - دەدى تۋريزم جانە سپورت ۆيتسە-ءمينيسترى ەرجان ەركىنبايەۆ.

ايتا كەتەيىك، 2020 -جىلى ساتى اۋىلى Lonely Planet حالىقارالىق اگەنتتىگىنىڭ نۇسقاسى بويىنشا جەرگىلىكتى قاۋىمداستىقتارعا نەگىزدەلگەن ءتۋريزمنىڭ ەڭ جاقسى باعىتى رەتىندە تانىلىپ، ماراپاتقا يە بولعان.