دۇنيەجۇزىلىك كوشپەندىلەر ويىنى نەسىمەن ەستە قالدى
استانا. KAZINFORM - ەلوردادا ۇيىمداستىرىلعان 5- دۇنيەجۇزىلىك كوشپەندىلەر ويىندارى مارەسىنە جەتتى.
8-13-قىركۇيەك كۇندەرى وتكەن كوشپەندىلەر وليمپياداسىنا 90 عا جۋىق مەملەكەتتەن 2500 دەن استام سپورتشى قاتىسىپ، 21 سپورت تۇرىنەن 97 مەدال جيىنتىعىن ساراپقا سالدى.
ەندى وسى الەم نازارىن استاناعا اۋدارعان ءباسى بيىك دودانىڭ قالاي وتكەنىن، نەسىمەن ەستە قالعانىنا تاعى ءبىر قىسقاشا شولۋ جاساپ وتسەك.
V دۇنيەجۇزىلىك كوشپەندىلەر ويىندارى اياسىندا اپتا بويى 21 سپورت تۇرىنەن سايىستار، «كوشپەندىلەر عالامى» ەتنواۋىلىندا مادەني شارالار، عىلىمي باعدارلاما شەڭبەرىندە «كوشپەندىلەر: تاريح، ءبىلىم، ساباقتار» اتتى عىلىمي- پراكتيكالىق كوفەرەنتسيا ۇيىمداستىرىلدى.
«قازانات» يپپودرومى ماڭىنداعى ەتنواۋىلدا 100 دەن اسا مادەني ءىس-شارا ۇيىمداستىرىلدى. ەلىمىزدىڭ بارلىق وڭىرىنەن جينالعان ونەرپازدار كۇندەلىكتى كونتسەرتتەر، اۋىلشارۋاشىلىعى جارمەڭكەلەرىن، كورمە، ايتىس سايىسىن وتكىزدى. بەلگىلى فوتوجۋرناليست دجيممي نەلسون كيىز ءۇي ىشىنەن فوتوستۋديا قۇردى. سونداي- اق، UNESCO، UNICEF، Alageum كيىز ۇيلەرى تىگىلدى.
21 سپورت ءتۇرى قامتىلعان سايىستار التى كۇن بويى 6 ءتۇرلى نىساندا ءوتتى. ناقتىراق ايتساق، «قازانات» يپپودرومى، «ارعىماك» سپورت الاڭى، ەتنواۋىل، ج. ۇشكەمپىروۆ اتىنداعى جەكپە- جەك سارايى، «الاۋ» مۇز سارايىلارىندا سپورتشىلارىمىز ءوزارا مىقتىنى انىقتادى.
V دۇنيەجۇزىلىك كوشپەندىلەر ويىندارىن ۇيىمداستىرۋ ديرەكسياسى ادەپكىدە، ەتنوسپورتتىڭ 21 ءتۇرى بويىنشا 97 مەدال جيىنتىعى ساراپقا سالىنادى دەپ جاريالاعان بولاتىن. شەتەلدىك قۇرامالاردىڭ ءوتىنىشى بويىنشا جارىس بارىسىندا ءداستۇرلى ساداق اتۋدان قوسىمشا «پۇت»، «قالقان» جانە «جامبى» نىسانالارى بويىنشا قىزدار سايىسى قوسىلىپ، مەدال جيىنتىعى 100 گە جەتتى. قازاقستان سپورتشىلارى 112 مەدالمەن كوش باستادى. ونىڭ 43 ءى التىن، 32 سى كۇمىس جانە 37 ءسى قولا جۇلدە.
ەكىنشى ورىندى قىرعىزستان ويىنشىلارى ەنشىلەدى. قىرعىز سپورتشىلارىنىڭ قورجىنىنا 65 مەدال ءتۇستى. ونىڭ 19 ى التىن، 21 ءى كۇمىس جانە 25 ءى قولا مەدال.
مەدال سانى بويىنشا ءۇشىنشى ورىندى رەسەي سپورتشىلارى يەلەندى. ولار 12 التىن، 12 كۇمىس جانە 25 قولا - جالپى 49 مەدال جەڭىپ الدى.
ويىندارعا قاتىسۋشىلاردىڭ كوبى - قازاقستاندىقتار. ەلىمىزدەن 195، قىرعىزستاننان 172، رەسەيدەن 144 سپورتشى قاتىستى.
قاتىسۋشىلار مەن قوناقتارعا 1600 گە جۋىق ۆولونتەر كومەكتەسىپ ءجۇردى.
ەتنواۋىلدا وتكەن جابىلۋ راسىمىنە سپورتشىلار دا قاتىستى. ولاردى 1000 عا جۋىق ۆولونتەر مەن ەتنواۋىل قوناقتارى قوشەمەتپەن قارسى الدى. جيىندا دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى نەجمەددين ءبىلال ەردوعان، قازاقستاننىڭ تۋريزم جانە سپورت ءمينيسترى ەربول مىرزابوسىنوۆ، قىرعىزستان رەسپۋبليكاسىنىڭ مادەنيەت، اقپارات، سپورت جانە جاستار ساياساتى ءمينيسترى التىنبەك ماقسۇتوۆ، 5-دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكسياسىنىڭ جەتەكشىسى نايل نۇروۆ ءسوز سويلەدى.
ەندى 6-دۇنيەجۇزىلىك كوشپەندىلەر ويىندارى قىرعىزستاندا وتەدى. بۇل تۋرالى نەجمەددين ءبىلال ەردوعان سالتاناتتى جيىن بارىسىندا حابارلادى. ول كوشپەندىلەر ويىندارى قىرعىزستانعا ورالاتىنىن ايتىپ، التىنبەك ماقسۇتوۆقا دكو سيمۆولى - تورسىقتى تابىستادى.
«قازانات» يپپودرومىنىڭ جانىندا بوي كوتەرگەن «كوشپەندىلەر الەمى» ەتنواۋىلىندا وتكەن 5-دۇنيەجۇزىلىك كوشپەندىلەر ويىندارىنىڭ جابىلۋ سالتاناتىنا تۋريزم جانە سپورت ءمينيسترى ەربول مىرزابوسىنوۆ، دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ءبىلال ەردوعان قاتىسىپ، ءسوز سويلەدى. ە. مىرزابوسىنوۆ بايراقتى باسەكە ۇلتتىق سپورتىمىزدى ۇلىقتاپ، سالت- ءداستۇرىمىزدى دارىپتەپ، مادەني مۇرامىزدى تورتكۇل دۇنيەگە پاش ەتكەن بىرەگەي وقيعا رەتىندە تاريحتا قالعانىن اتاپ ءوتتى.
«مەملەكەت باسشىسى قاسىم-جومارت توقايەۆتىڭ تىكەلەي باستاماسىمەن قازاق توپىراعىندا ۇيىمداستىرىلعان دۇنيەجۇزىلىك كوشپەندىلەر ويىندارى - ءمانى تەرەڭ، مازمۇنى باي بىرەگەي جوبا. ونىڭ تۇركى الەمىنىڭ التىن بەسىگى - قازاق جەرىندە جالاۋىن جەلبىرەتكەنى - ءبىز ءۇشىن زور مارتەبە ءارى شىن ماقتانىش. ويىنداردا 30 دان استام ەلدىڭ سپورتشىلارى مەدال يەلەندى. جۇلدە العان مەملەكەتتەر قاتارىندا مۇحيتتىڭ ارعى جاعىنان كەلگەن كانادا مەن مەكسيكا سپورتشىلارى دا بار. ءدۇبىرلى دوداعا 90 عا جۋىق مەملەكەتتىڭ قاتىسۋى، 30 دان استام ەلدىڭ جۇلدەگەرلەر قاتارىنان كورىنۋى - دۇنيەجۇزىندە كوشپەندىلەر ويىندارىنا دەگەن قىزىعۋشىلىقتىڭ ارتىپ كەلە جاتقانىن اڭعارتادى. كەلەسى، 6-دۇنيەجۇزىلىك كوشپەندىلەر ويىندارىن باۋىرلاس مەملەكەت - قىرعىز رەسپۋبليكاسى قابىلدايدى. قىرعىز ەلىنىڭ الداعى باسەكەنى جوعارى دەڭگەيدە وتكىزۋىنە تىلەكتەسپىن. كوشپەندىلەر وليمپياداسىنىڭ بەدەلى بيىكتەي بەرسىن!»، - دەدى ەربول مىرزابوسىنوۆ.
ەندى ەكى جىلدان كەيىن كەلەسى كەزەكتى دۇنيەجۇزىلىك كوشپەندىلەر ويىنى قىرعىزستاندا وتەتىن بولادى.
اۆتور
كۇنسۇلتان وتارباي
