دۇنيەجۇزىلىك كوشپەندىلەر ويىندارىنىڭ ۆولونتەرلىك باعدارلاماسى تانىستىرىلدى

استانا. KAZINFORM - استانانىڭ ءبىرقاتار ۋنيۆەرسيتەتىندە ستۋدەنتتەرگە 5- دۇنيەجۇزىلىك كوشپەندىلەر ويىندارىنىڭ ۆولونتەرلىك باعدارلاماسى تانىستىرىلدى.

تۋريزم جانە سپورت مينيسترلىگى ءمالىم ەتكەندەي، جيىنداردا 5-دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكتسيا باسشىلىعى ۆولونتەرلەردىڭ وسى ويىندارعا ۇلەس قوسۋعا مۇمكىندىگى بارىن، ەرىكتىلەر قىزمەتىنىڭ تاجىريبە جيناۋداعى ماڭىزىن جەتكىزدى. سونىمەن قاتار ۆولونتەرلەرگە قويىلاتىن تالاپ، ەرەجە، ىرىكتەۋ كەزەڭدەرى تۋرالى مالىمەت جان-جاقتى ءتۇسىندىرىلدى.

«جاستاردىڭ ەرىكتىلەر جاساعى - سپورتتىق جانە مادەني شارالاردىڭ ماڭىزدى بولىگى. مەيماندى قارسى الۋ، ولارعا جول كورسەتىپ، باعىت سىلتەۋ، شەتەلدىكتەرگە اۋدارماشى بولۋ سياقتى كوزگە كورىنبەيتىن ءىستىڭ بارىندە ۆولونتەر جۇرەدى. بىلايشا ايتقاندا، ەرىكتى دەگەنىمىز ءوزارا رياسىز كومەك پەن پاتريوتيزمنىڭ، قوعامعا جانە ەلگە پايدالى ادام بولۋدىڭ جارقىن ۇلگىسى. دەرەك ءۇشىن ايتساق، EXPO-2017 كورمەسىنە 7000 نان استام ەرىكتى قاتىستى. قىسقى ازيا ويىندارىندا دا جاس ورەندەرىمىز ۆولونتەر رەتىندە بەلسەندىلىك تانىتتى»،- دەلىنگەن مينيسترلىك تاراتقان حابارلامادا.

5-دۇنيەجۇزىلىك كوشپەندىلەر ويىندارىنا ۆولونتەر بولۋعا نيەت بىلدىرۋشىلەر https://worldnomadgames.kz/ سايتى ارقىلى «ەرىكتى بول» بولىمىنە كىرىپ، ساۋالنامانى تولتىرۋى كەرەك. بارلىق تالاپتان سۇرىنبەي وتكەن ۇمىتكەر سۇحباتقا شاقىرىلادى. ۆولونتەر جۇمىسىنا 18 جاستان اسقان ۇمىتكەر تاڭدالادى.

ەستەرىڭىزگە سالا كەتەيىك، وسىعان دەيىن استانا قالاسىندا ۇيىمداستىرىلاتىن V دۇنيەجۇزىلىك كوشپەندىلەر ويىندارىنىڭ سپورتتىق سايىستارى رەسمي تۇردە بەكىتىلگەنىن جازعان بولاتىنبىز.

دۇنيەجۇزىلىك كوشپەندىلەر ويىندارى - ەتنيكالىق، ءداستۇرلى سپورت تۇرلەرى بويىنشا وتەتىن حالىقارالىق جارىس.

2014، 2016-جانە 2018 -جىلدارى قىرعىزستاننىڭ شولپان اتا قالاسىندا وتسە، 2022 -جىلى تۇركيانىڭ يزنيك شاھارىندا ءتورتىنشى دۇنيەجۇزىلىك ويىندار ۇيىمداستىرىلدى.

ەندى V دۇنيەجۇزىلىك كوشپەندىلەر ويىنى بيىل، ياعني 2024 -جىلى 8-14 -قىركۇيەك ارالىعىندا استانا قالاسىندا وتەدى.

اۆتور

كۇنسۇلتان وتارباي