دۇنيەجۇزىلىك كوشپەندىلەر ويىندارىنىڭ تىكەلەي ترانسلياتسياسى قانشادا باستالادى

استانا. KAZINFORM - بۇگىن ەلوردادا ساعات 19:00 دە دۇنيەجۇزىلىك كوشپەندىلەر ويىندارىنىڭ تىكەلەي ترانسلياتسياسى باستالادى.

V دۇنيەجۇزىلىك كوشپەندىلەر ويىندارى استانادا 8-13-قىركۇيەك ارالىعىندا وتەدى. وعان الەمنىڭ 89 ەلىنەن 2500 دەن استام قاتىسۋشى قاتىسادى.

شارانىڭ اشىلۋ ءراسىمى «استانا ارەنا» ستاديونىندا وتەدى.

ق ر مادەنيەت جانە اقپارات مينيسترلىگىنىڭ حابارلاۋىنشا، شوۋعا 3 مىڭ ارتيست قاتىسادى. شارانىڭ اشىلۋ ءراسىمىنىڭ الدىندا، 8-قىركۇيەك كۇنى ساعات 16:00 دە قازاقستاندىق ەسترادا جۇلدىزدارىنىڭ قاتىسۋىمەن كونسەرت وتەدى. كونسەرت اياقتالىسىمەن ساعات 19:00 دە رەسمي اشىلۋ سالتاناتى بولادى. شوۋ بارىسىندا ساحنا مەن مۋلتيمەديانىڭ زاماناۋي تەحنولوگيالارى قولدانىلا وتىرىپ، ەكى ساعاتتىق مۋزىكالىق تەاترلاندىرىلعان قويىلىم ۇيىمداستىرىلادى.

قالىپتاسقان ءداستۇر بويىنشا اشىلۋ راسىمىندە سپورتتىق دەلەگاتسيالاردىڭ شەرۋى وتەدى. سوڭىندا قازاقستاننىڭ حالىق ءارتىسى ديماش قۇدايبەرگەننىڭ ورىنداۋىنداعى حالىقتار دوستىعى مەن بىرلىگى تۋرالى مۋزىكالىق كومپوزياتسيا ورىندالادى.

ويىندارعا قاتىسۋشىلار مەن قوناقتاردى قابىلداۋ ءۇشىن 20 قوناق ءۇي مەن 331 كولىك قاراستىرىلعان. مەديتسينالىق شتابتا 150 مەديتسينالىق قىزمەتكەر، 23 ۆەتەرينار جۇمىس ىستەيدى. 1300 ۆولونتەر قىزمەت اتقارادى. سونداي-اق ب ا ق- قا ارنالعان اككرەديتاتسياعا جالپى 64 ەلدەن 1185 ءوتىنىم تۇسكەن.

ويىندار بىرنەشە جەردە وتەدى: «دۋمان» قوناق ءۇيى، «قازانات» يپپودرومى، ەتنواۋىل، ج. ۇشكەمپىروۆ اتىنداعى جەكپە-جەك سارايى جانە «الاۋ» مۇزايدىنى مەن «استانا ارەنا» كەشەنىندە.

ايتا كەتەيىك، كوشپەندىلەر ويىنىن «جىبەك جولى» تەلەارناسىنان تىكەلەي ەفير ارقىلى تاماشالاۋعا بولادى.

وسىعان دەيىن دۇنيەجۇزىلىك كوشپەندىلەر ويىندارى كەزىندە ەلوردالىق مەديتسينالىق ۇيىمدار قالاي جۇمىس ىستەيتىنىن جازدىق.

كوشپەندىلەر ويىنىنىڭ العاشقى كۇنىندە قانداي سپورت تۇرلەرىنەن جارىس وتەدى.