دۇنيەجۇزىلىك كوشپەندىلەر ويىندارىنىڭ بيلەتتەرى ساتىلىمعا شىقتى

استانا. KAZINFORM - بۇگىن 8-13-قىركۇيەك ارالىعىندا استانادا وتەتىن 5- دۇنيەجۇزىلىك كوشپەندىلەر ويىندارىنىڭ اشىلۋ سالتاناتى مەن بارلىق جارىستارىنا بيلەتتەر ساتىلىمى باستالدى.

الەمدىك ەتنوسپورتتىڭ باستى وقيعاسىنا 89 ەلدەن 2 مىڭنان استام سپورتشى قاتىسادى. بۇل تۋرالى كوشپەندىلەر ويىندارى ديرەكتسياسىنىڭ باسپا ءسوز قىزمەتى مالىمدەدى.

ويىنداردىڭ اشىلۋ سالتاناتى 8-قىركۇيەك كۇنى «استانا- ارەنا» ستاديونىندا وتەدى. بيلەتتەر قۇنى 15000 تەڭگەدەن باستالىپ، 50000 تەڭگەگە دەيىن بولادى.

سپورت باعدارلاماسىنا 21 سپورت ءتۇرى كىرەدى. سپورت جارىستارىنا ورتاشا بيلەت قۇنى 3600 تەڭگەنى قۇرايدى.

قازاق كۇرەسى، الىش جانە كوراش جاقسىلىق ۇشكەمپىروۆ اتىنداعى جەكپە-جەك سارايىندا وتەدى جانە بيلەتتەر 2500 تەڭگەدەن 7500 تەڭگە ارالىعىندا بولادى.

«الاۋ» مۇزايدىنىندا اسىق اتۋ، وردو، ماس- رەستلينگ، كۇراش، ارقان تارتۋ جانە اشىرتمالى ابا گۇرەشى بويىنشا جارىستار وتەدى. بيلەت قۇنى 1000-3000 تەڭگە ارالىعىندا.

كوكپار، كوك ءبورى جانە بايگە بويىنشا تارتىستى جارىستار «قازانات» يپپودرومىندا وتەدى. كوكپار مەن كوك ءبورى بويىنشا ىرىكتەۋ كەزەڭدەرىنە بيلەتتەر قۇنى 2000-15000 تەڭگە ارالىعىندا بولسا، فينالدىق كەزەڭىنىڭ بيلەتتەرى 2000 تەڭگەدەن باستالىپ، 15000 تەڭگەگە دەيىن بارادى. بايگە جارىستارىنا بيلەت قۇنى 3000-15000 تەڭگە بولماق.

ەتنواۋىلدا جامبى اتۋ، تەڭگە ءىلۋ، اۋدارىسپاق، قۇسبەگىلىك، سونداي-اق الىپتار سايىسى «Powerful Nomad» جارىستارىن كورۋگە بولادى. اتالعان سپورت تۇرلەرى بويىنشا بيلەتتەر 1000 تەڭگەدەن باستالىپ، 2000 تەڭگەگە دەيىن بولادى.

كورەرمەن كوزايىمىنا اينالعان ءداستۇرلى ساداق اتۋ سپورتى بويىنشا باسەكەلەر «ارعىماق» ات-سپورتتىق ساۋىقتىرۋ كەشەنىندە وتەدى. بيلەتتەر قۇنى 600 تەڭگەدەن باستالىپ، 3000 تەڭگەگە دەيىن بولادى.

ءداستۇرلى زياتكەرلىك ويىندار سانالعان توعىزقۇمالاق، مانگالا جانە وۆاري جارىستارى كورەرمەندەرسىز وتەدى.

ازاماتتاردىڭ جەكەلەگەن ساناتتارى ءۇشىن ءارتۇرلى جەڭىلدىكتەر قاراستىرىلعان. %50 جەڭىلدىك مەكتەپ وقۋشىلارى (6 جاستان 18 جاسقا دەيىن) مەن زەينەتكەرلەر ءۇشىن قولجەتىمدى. 5 جاسقا دەيىنگى بالالار (ورىنسىز) مەن I جانە II توپتاعى مۇگەدەكتەر بيلەتتەردى تەگىن الا الادى.

جەڭىلدىك بيلەتتەرىن راستايتىن قۇجاتتى كورسەتكەننەن كەيىن وففلاين كاسسالاردان ساتىپ الۋعا بولادى.

بارلىق جارىستارعا بيلەتتەردى رەسمي بيلەت وپەراتورىنىڭ www.zakazbiletov.kz سايتىنان ساتىپ الۋعا بولادى.

ايتا كەتەرلىگى، استانادا وتەتىن دۇنيەجۇزىلىك كوشپەندىلەر ويىندارىندا بارلىعى 21 سپورت تۇرىنەن 97 مەدال جيىنتىعى ساراپقا سالىنادى. 5- دۇنيەجۇزىلىك كوشپەندىلەر ويىندارىنىڭ باس دەمەۋشىسى - ALAGEUM ELECTRIC، ويىنداردىڭ باس سەرىكتەسى - Halyk Bank.