دۇنيەجۇزىلىك كوشپەندىلەر ويىندارىنىڭ باستالۋىنا 30 كۇن قالدى

2024 -جىلدىڭ 8-13-قىركۇيەگى ارالىعىندا استانادا V دۇنيەجۇزىلىك كوشپەندىلەر ويىندارى وتەدى. جارىسقا الەمنىڭ 89 ەلىنەن 2 مىڭنان استام سپورتشى قاتىسادى. سپورتتىق جارىستار مەن مادەني ءىس-شارالارعا 100 مىڭنان استام تۋريست كەلەدى دەپ كۇتىلىپ وتىر. بۇل تۋرالى V دۇنيەجۇزىلىك كوشپەندىلەر ويىندارىنىڭ ديرەكسياسى حابارلادى.

اتالعان ءدۇبىرلى دودادا سپورتتىڭ 21 ءتۇرى بويىنشا جارىستار وتەدى. ولاردىڭ قاتارىندا ات جارىسى، ۇلتتىق كۇرەس تۇرلەرى، ءداستۇرلى زياتكەرلىك ويىندار، جەكپە-جەك تۇرلەرى بويىنشا جارىستار، ساداق اتۋ، قۇستارمەن اڭ اۋلاۋدىڭ ۇلتتىق تۇرلەرى، ات جارىستارى، حالىق ويىندارى بار.

تىكەلەي استانادا «كوشپەندىلەر الەمى» ەتنواۋىلى اشىلادى، وندا ءاربىر كەلۋشى قازاق حالقىنىڭ مادەنيەتى مەن داستۇرلەرىمەن، سونداي- اق قاتىسۋشى ەلدەردىڭ وزىندىك مادەنيەتىمەن تانىسا الادى.

كۇن سايىن ەتنواۋىلعا ەلوردانىڭ 10 مىڭنان استام تۇرعىنى مەن قوناعى بارا الادى. استانادا V دۇنيەجۇزىلىك كوشپەندىلەر ويىندارى «ۇلى دالا ءدۇبىرى» ۇرانىمەن وتەدى.

سونىمەن قاتار V دۇنيەجۇزىلىك كوشپەندىلەر ويىندارى اياسىندا 9-11-قىركۇيەكتە ۇلتتىق مۋزەيدە «كوشپەندىلەر: تاريح، ءبىلىم، ساباقتار» اتتى حالىقارالىق عىلىمي-پراكتيكالىق كونفەرەنتسيا وتەدى. ول «تاريح جانە مادەنيەت»، «سپورت عىلىمى» جانە «ورتالىق ازيا كوشپەندىلەرىنىڭ تاماقتانۋى» سەكسيالارىنان تۇرادى.