دۇنيەجۇزىلىك كوشپەندىلەر ويىندارىندا تۇڭعىش رەت بارلىق قۇرلىقتىڭ وكىلدەرى باق سىنايدى

استانا. KAZINFORM - ءدۇبىرلى دودا جاقىنداعان سايىن ۇيىمداستىرۋشىلار بار دايىندىقتى پىسىقتاپ جاتىر. بۇعان دەيىن مەملەكەت باسشىسى قاسىم-جومارت توقايەۆ سپورتتىق نىسانداردىڭ دايىندىعىن تەكسەرىپ، سپورتتىق جارىستى جوعارى دەڭگەيدە وتكىزۋدىڭ ماڭىزدىلىعىن اتاپ وتكەن بولاتىن.

ورتالىق كوممۋنيكاتسيالار الاڭىندا وتكەن بريفينگىدە V دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكسيا باسشىسىنىڭ ورىنباسارى ابىلاي قوندىبايەۆ بايراقتى باسەكەگە قاتىسۋعا 89 ەلدەن 2430 قاتىسۋشى نيەت بىلدىرگەنىن مالىمدەدى.

«ونىڭ قاتارىنا جاتتىقتىرۋشىلار دا كىرەدى. 21 سپورت ءتۇرى بويىنشا 97 مەدال جيىنتىعى ساراپقا سالىنادى. مەدال سانى - 581 دانا. V دۇنيەجۇزىلىك كوشپەندىلەر ويىندارىنىڭ جالپى جۇلدە قورى - 250 ميلليون تەڭگە»، - دەدى ول.

دۇنيەجۇزىلىك كوشپەندىلەر ويىندارىنا قاتىسۋشىلار مەن قوناقتاردى قابىلداۋ ءۇشىن 20 قوناقۇي مەن 331 كولىك قۇرالى قاراستىرىلعان.

ويىندار كەزىندە بارلىعى 1300 ۆولونتەر قىزمەت اتقارادى. سونداي- اق ب ا ق- قا ارنالعان اككرەديتاتسياعا جالپى 64 ەلدەن 1185 ءوتىنىم كەلىپ تۇسكەن. ولاردىڭ قاتارىندا CNN، BBC، Euronews, CCTV، Rai, CBC TV، Balkan Trip TV، TRT Türk تەلەارنالارى، National Geographic, Agence-France Presse (كانادا)، Lonely Planet, Nikkei Asia جانە باسقا دا ءىرى ب ا ق وكىلدەرى بار. ميلليونداعان اۋديتورياسى بار بلوگەرلەر دە الەمدىك جارىستى ناسيحاتتاۋدان تىس قالماق ەمەس.

V دۇنيەجۇزىلىك كوشپەندىلەر ويىندارى بارىسىندا مەديتسينالىق شتابتا 150 مەديتسينالىق قىزمەتكەر جۇمىس ىستەيدى. سونىمەن قاتار 23 ۆەتەرينار دا جارىس الاڭىندا قىزمەت اتقارادى.

كوشپەندىلەر ويىندارىنا شامامەن 560 سپورتتىق ات جانە 45 قۇس قاتىسادى.

«بۇل الەمدىك جارىسقا العاش رەت قاتىساتىن ەلدەر دە بار. بيىل تۇڭعىش رەت بارلىق قۇرلىقتىڭ وكىلدەرى باق سىنايدى. قاتىسۋشى ەلدەر اراسىندا قازاقستانعا كەلەتىن ەڭ الىس ەل اۋستراليا بولماق»، - دەدى ابىلاي قوندىبايەۆ.

ەستەرىڭىزگە سالا كەتەيىك، V دۇنيەجۇزىلىك كوشپەندىلەر ويىندارى استانا قالاسىندا 8-13-قىركۇيەك ارالىعىندا وتەدى.