دۇنيەجۇزىلىك كوشپەندىلەر ويىندارى: تۇركيا تاس-ءتۇيىن دايىن
استانا. KAZINFORM - قىركۇيەكتىڭ 8-13-ارالىعىندا استانادا V دۇنيەجۇزىلىك كوشپەندىلەر ويىندارى جالاۋىن جەلبىرەتەدى.
ءدۇبىرلى دوداعا 80 نەن استام ەلدەن 2000 نان اسا سپورتشى قاتىسىپ، 21 سپورت تۇرىنەن جۇلدەگە تالاسادى دەپ كۇتىلىپ وتىر. ولاردىڭ قاتارىندا تۇركيا ەلى دە بار.
بەلگىلى بولعانداي، تۇركيا دۇنيەجۇزىلىك كوشپەندىلەر ويىندارىندا 9 سپورت تۇرىنە قاتىسۋعا نيەت بىلدىرگەن. اتالعان ەلدەن 120 عا جۋىق سپورتشى توپ جارۋعا بارىن سالماق.
ەستەرىڭىزگە سالساق، سوڭعى رەت دۇنيەجۇزىلىك كوشپەندىلەر ويىندارى وسىدان ەكى جىل بۇرىن تۇركيانىڭ يزنيك قالاسىندا وتكەن ەدى. دودانى جوعارى دەڭگەيدە ۇيىمداستىرعان تۇرىكتەر استانا قالاسىندا دا قىزۋ تارتىس بولاتىنىنا سەنىمدى.
دۇنيەجۇزىلىك ەتنوسپورت كونفەدەراتسياسىنىڭ باسقارما مۇشەسى ابدۋحادي تۋرۋستىڭ ايتۋىنشا، اتالعان جارىستى وتكىزۋدە تاجىريبە جيناقتار العان تۇركيا قازاقستاندىق ارىپتەستەرىنە بارىنشا قولعابىس كورسەتىپ جاتىر.
«ءبىزدى ورتاق ءتىل، تاريح جانە مادەنيەت، داستۇرلەر مەن ادەت- عۇرىپتار بىرىكتىرەدى. ءبىز استانادا وتەتىن اۋقىمدى ءىس- شاراعا قاتىسۋعا دايىنبىز. ءوز تاجىريبەمىزبەن ءبولىسىپ جاتىرمىز بۇعان دەيىن قازاقستاندىق ارىپتەستەرمەن ءجيى كەزدەسىپ، دايىندىق پروتسەسىن پىسىقتادىق. دۇنيەجۇزىلىك كوشپەندىلەر ويىندارى بيىل جوعارى دەڭگەيدە وتەتىنىنە سەنىمدىمىز»، - دەدى ول.
دۇنيەجۇزىلىك ەتنوسپورت كونفەدەراتسياسىنىڭ تاعى ءبىر باسقارما مۇشەسى وسمان باسەر مۇنداي ءىس- شارالار جاستاردى مادەنيەتتى عىپ تاربيەلەۋ ءۇشىن وتە ماڭىزدى ەكەنىن اتاپ ءوتتى.
«كوشپەندىلەر ويىندارىندا قاتىسۋشىلار سپورت ارقىلى ءبىر- بىرىمەن تانىسادى. ءبىزدىڭ ماقساتىمىز - مۇرانى كەلەسى ۇرپاققا ساقتاۋ. بۇل تۇرعىدا قازاقستان ءوز مىندەتتەمەلەرىن ورىندايتىنى ءسوزسىز. سونىمەن قاتار، تۇركيادا تاعى ەكى حالىقارالىق قۇرىلىم كوشپەندىلەر ويىندارىنا دايىندالۋدا. ولار - تۇركى مەملەكەتتەرى مەن تۇركسوي ۇيىمى. سوڭعىسى تۇركى حالىقتارىنىڭ مادەني مۇراسىن ناسيحاتتاۋ جانە تۇركى مەملەكەتتەرى اراسىنداعى مادەني-گۋمانيتارلىق بايلانىستاردى دامىتۋ ءۇشىن كورمەلەر مەن سپەكتاكلدەر وتكىزەدى»، - دەدى و. باسەر.
ايتا كەتەيىك، بيىلعى كوشپەندىلەر ويىندارىنا برۋنەي- دارۋسسالام، ليبەريا، ۆەنەسۋەلا، يرلانديا، دومينيكان، گامبيا، برۋني، ەفيوپيا، پەرۋ ەلىنىڭ سپورتشىلارى العاش رەت قاتىسادى.
