دۇنيەجۇزىلىك كوشپەندىلەر ويىندارى كەزىندە قازاق اۋىلى قۇرىلادى
استانا. KAZINFORM - بيىل كۇزدە استانادا V دۇنيەجۇزىلىك كوشپەندىلەر ويىندارى وتەدى. ايتۋلى شاراعا 89 مەملەكەت قاتىساتىنىن راستادى. بۇل تۋرالى تۋريزم جانە سپورت ۆيتسە-ءمينيسترى سەرىك جاراسبايەۆ ءمالىم ەتتى.
«كوشپەندىلەر ويىندارىنا دايىندىق جۇمىستارى قارقىندى ءجۇرىپ جاتىر. ويىندار 21 سپورت تۇرىنەن وتەدى، ونىڭ ىشىندە ۇلتتىق ويىندار دا بار. ول ءۇشىن 7 سپورت كەشەنىندە دايىندىق ءجۇرىپ جاتىر. سول سياقتى «قازانات» يپپودرومى ماڭىندا قازاق اۋىلىن قۇراتىن بولامىز، ياعني كيىز ۇيلەر تىگىلەدى»، - دەدى سەرىك جاراسبايەۆ ب ا ق وكىلدەرىنە سۇحبات بەرە تۇرىپ.
سونداي-اق، دۇنيەجۇزىلىك كوشپەندىلەر ويىندارى كەزىندە ۇلتتىق عىلىمي كونفەرەنسيا وتكىزۋ جوسپارلانىپ وتىر.
«قازىرگى كۇنى 89 ەل كوشپەندىلەر ويىندارىنا قاتىساتىندىعىن راستادى جانە ونى 100 مەملەكەتكە دەيىن جەتكىزەمىز دەگەن سەنىمدەمىز. دەلەگاتسيا، سپورتشىلاردى قوسقاندا 2500 دەن اسا قوناق كەلەدى دەپ كۇتىپ وتىرمىز. شەتەلدىك مەيمانداردى كۇتىپ الىپ، ورنالاستىرۋ ءۇشىن ەلوردا اكىمدىگىمەن بىرلەسىپ 32 قوناق ءۇيدى دايىنداپ جاتىرمىز»، - دەيدى ول.
ايتا كەتەيىك، بۇگىن استانادا ش ى ۇ سامميتىنە كەلگەن مەيماندارعا كوشپەندىلەر ويىندارىنا دايىندىق بارىسى تانىستىرىلدى.
شەتەلدىك دەلەگاتتار اراسىندا گەرمانيا، ءۇندىستان، يسپانيا، يتاليا، وڭتۇستىك كورەيا، ليۆان، مالايزيا، نورۆەگيا، سەربيا جانە چەحيادان كەلگەن دەلەگاتتار مەن جۋرناليستەر بار.
ەسكە سالا كەتەيىك، دۇنيەجۇزىلىك كوشپەندىلەر ويىندارىنىڭ قازاقستاندا وتەتىنى بىلتىر قازاندا بەلگىلى بولدى.
ال بيىل ناۋرىزدا العاشقى بيلەت ساتىلدى.
ايتا كەتەيىك، دۇنيەجۇزىلىك كوشپەندىلەر ويىندارى UNESCO قولداۋىمەن وتەدى.
